Sapa limpyuhan; mga biofence sa sapa epektibo sa pagsagang sa mga basura
Moabot ngadto sa 16 ka mga organisasyon mosalmot sa river clean-up sa Bulacao river karong Pebrero 23.
Si Nida Cabrera, pangulo sa Cebu City Environment and Natural Resources Office (CCENRO) niingon nga kapin o kulang 1,000 ka mga tawo ang nipadayag sa ilang kaandam pagtabang.
Si Konsehal Joel Garganera, kanhi chairman sa committee on environment, nisuporta sa kalihukan.
Nipadayag nga siya mismo moapil sa paglimpyo sa sapa.
Matod pa ni Garganera nga di angay mobasol ni bisan kinsa sanglit ang tanan maoy responsabli sa hugaw nga niabot sa sapa.
“We need to have an awareness that people should change the attitude in treating our rivers. In other countries they chose to live along the river banks to enjoy the nature. But here, they seem to choose so that they can easily dump,” padayag ni Garganera.
Si Garganera niingon nga dugay rang ‘biologically dead’ ang tanang sapa sa urban areas nga kinahangkan nga banhawon aron mahibalik ang kalimpyo labi na ang gidak-on sa sapa.
Iyang gi-awhag si Mayor Tomas Osmeña nga himuon kanunay ang paglimpyo sa sapa ug di lang kay molihok kay hapit na ang piniliay.
Si Cabrera nagkanayon nga unahon nila og limpyo ang Bulacao river sanglit kini ang labing hugaw ug mao sab ang rekomendasyon sa DENR subay sa kamanduan ni Secretary Roy Cimatu.
NAKATABANG
Naibanan og labing menos 15 ka toneladang basura matag semana ang gidaghanon sa hugaw nga mapundok sa kadagatan sa dakbayan sa Sugbo.
Kini human masala sa biofence nga gibutang sa Mahiga creek, baybayon sa Pasil, Ermita, sapa sa Tinago ug Tejero.
Matod pa ni Cabrera nga dako na og kalambuan ang kalimpyuhon sa sapa ug baybayon nga dagsaan sa tubig gikan sa maong mga sapa.
Iyang gitug-an nga moabot sa 15 ngadto sa 20 ka toneladang basura ang masala sa biofence matag semana sa lima ka mga sapa diin ang labing daghan nahimutang sa Mahiga creek.
Iyang gipasalamatan ang barangay Subangdaku kinsa niabag usab sa paghipos sa basura sanglit aduna silay kasabutan ni Kapitan Ernie Manatad kay ang pikas habig sa Mahiga iya sa Mandaue City.
Ang CCENRO mohabwa sa basura nga nabaling sa biofence kaduha matag semana diin ang City Government nitagana og usa ka dumptruck para paghakot sa basura sa 5 ka sapa.
Si Cabrera niingon nga kon malimpyohan na nila ang Bulacao ug Guadalupe rivers, mobutang usab sila og biofence sama sa laing lima ka sapa aron di malahos sa kadagatan ang basura.
Ang mao nga mga biofences gipamutang sa CCENRO ubos sa pagpangulo ni Cabrera sa hinapos sa miaging tuig.
Gisugdan kini nila sa may dapit sa Barangay Suba ug Pasil una pa ang laing mga dapit.