Pamasin sa BOPK

Hangtod karon wala pa madesisyoni sa Commission on Election (Comelec) didto sa Kaulohan ang petisyon nga gisang-at batok sa duha ka kandidato pagkakonsehal ubos sa Bando Osmeña-Pundok Kauswagan sa dakbayan sa Sugbo. Gitumbok mao sila si Cebu City Councilors Sisinio Andales ug Alvin Arcilla kinsa magpasubli sa ilang kandidatora sa norte distrito bisan pa man og giingon nga napupos na ang ilang tulo ka sunodsunod nga termino.

Ang laing duha ka mga kandidato sa dakbayan nga nag-atubangan usab og petition for disquali ication mao sila si Paulino Osmeña ug Sherwin Abella.

Si Paulino midagan pagka-mayor isip independent candidate samtang si Abella pagka-konsehal.

Si Marchel Sarno sa North District Comelec mipasabot nga sanglit wala pay desisyon gikan sa ilang ulohang buhatan, malakip gihapon sila sa listahan sa mga kandidato.

Apan sa higayon nga kon hingpit na sila nga ideklarar nga ma-disqualified, ang ilang mga botos dili na iphon o mahimo na kining stray votes. Pero wala kini magpasabot nga diha-diha gilayon hingpit silang mawad-an sa paglaom sa pagpapili kay dili pa man final ug executory ang ilang pagka disqualified.

Mahimo pa silang maka file og motion for reconsideration ngadto sa commission en banc. Kon di pa gyud mosaler, makadangop pa sila sa Supreme Court.

Sa ato pa, hataas pa ang proseso aron pagkab-ot sa final decision. Apan naghatag usab kini kanila sa apiki nga sitwasyon tungod kay nagkaduol ug magsugod na ang kampanya alang sa local nga mga kandidato karong Marso 29.

Kritikal kini nga sitwasyon alang sa BOPK kay kon mahitabo nga ma-disqualified gyud si Andales ug Arcilla, makaapekto ni sa ilang tinguha nga mayoriya sa konseho.

Mao ni resulta sa pangindahay ug pamasin sa BOPK.