Davide nanaway pero otro pod

Sa iyang pag-asumir niadtong 2013, kusganong gisaway ni Gov. Helario Davide III ang gisundan niyang administrasyon ni Gov. Gwen Garcia. Iya kining gitawag nga pinaka-corrupt nga administrasyon. Gisaway ni Davide ang pagtukod ni Garcia sa kontrobersiyal nga Cebu International Convention Center (CICC) ug ang pagpalit niini sa Balili Property.

Gisaway usab niini ang pagsulod og mga kontrata ni Gwen nga wala mo-agi sa Provincial Board. Sa iyang paglingkod, matod ni Davide, dili siya mo-honor sa maong mga kontrata kay illegal kini. Dili niya bayaran ang mga kontraktor ug mga suppliers. Apan diay to na-areglo ra gihapon kay iya man nga gibayaran sama anang mga Suroy-Suroy buses. Aber, kinsa may corrupt?

Pero ang iyang mga gipangsaway ni Gwen kaniadto iyang gipanghimo karon. Kanang iyang pagpamugos pagtukod anang P1.3 bilyones nga 20 ka andanang Capitol Resource Center. Tiaw nimo nang nangutang lang ang Kapitolyo aron itukod anang maong edipisyo nga dili priority. Para sa unsa man gyud na nga naa pa man ang original Capitol building? Pang-commission lang kay eleksiyon na?

Wala hatagi og priority ni Davide ang mga batakan nga panginahanglan sa katawhan didto sa probinsiya. Ang serbisyo sa Kapitolyo wala lang mag-sentro sa mga kawani o mga molupyo dinhi sa dakbayan sa Sugbo nga ania mahimutang ang Kapitolyo. Mas labaw nga nanginahanglan ang katawhan sa lalawigan. Unsa man ang estado sa atong mga district hospitals? Ang mga farm

to market roads ug ang mga livelihood programs sa mga konstituwente sa lalawigan.

Nanaway si Davide nga naghitak ang kurapsiyon sa administrasyon ni Garcia apan wala usab niya huna-hunaa nga mas labaw pang naghitak ang kurapsiyon sa iyang administrasyon. Unsa may iyang gihimo aron mapakgang ni? Binuhatan kini sa iyang mga tawo. Kon wala siya makabadlong, aw, posibleng apil siya. Gobernador unya way kalibutan sa nagapanghitabo sa palibot? Aw, labaw pa siya sa tawo-tawo sa humayan. Ang tawag ana namo didto sa Mindanao, pahoy. (bobbygnalzaro@gmail.com)