166 ka mga tawo nasikop sa gihingusgang kampanya batok sa kriminalidad sa Leyte

Tacloban City- Niabot og 166 ka mga tawo ang nadakpan sa managlahi nga mga operasyon sa kapulisan sa lalawigan sa Leyte sud sa 17 ka adlaw.

Base sa report sa Leyte Police Provincial Office (LPPO), pinakadaghan nga nasikop mao ang dunay mga warrants of arrest.

Sa datos sa LPPO, upat ka mga tawo nga lakip sa top ten most wanted persons ang ilang nasikop samtang 81 ang wanted persons.

Lakip sa datos ang upat nga nasikop gumikan sa pagpatuman sa search warrants ug 12 ang nasikop kalabot sa ilegal nga drugas.

Duha ang nasikop kalapasan sa Revised Forestry Code of Philippines, duha naman ang nasikop sa paglapas sa Coconut Preservation Act of 1995 ug 38 ang nasikop sa kalapasan sa Fisheries Code of 1998.

Miabot naman og 12 ang nasikop gumikan sa ilegal nga sugal, upat ang nasikop gumikan sa ilegal nga paghupot og armas ug pito naman ang nasikop sa ilegal nga paghupot og hinagiban.

Niabot usab sa 1,399 ka police checkpoints ang gihimo sa LPPO, 561 ang naisyuhan og citation tickets gumikan sa kalapasan sa traffic ordinance.

Duna usay 23 ka mga motorsiklo ang na impound sa nagkalainlain nga police station kay way mga dokumento.

Matod ni Police Senior Superintendent Rolando Bade, acting provincial director, ang maong mga operasyon uban sa tabang sa mga lokal nga kagamhanan ang rason nga pabiling luwas ug malinawon ang lalawigan sa Leyte.