5 ka ‘durugista’ nadakpan sa pulis
Kananga, Leyte- Lima ka drug personalities ang nasikop sa managlahi nga anti illegal drugs operation sa miaging adlaw.
Sa Baybay City sa Leyte, usa ka ginang ug tulo ka mga lalake ang nasikop sa joint buy bust operation sa Baybay Drug Enforcrment Unit, Provincial Drug Enforcement Unit ug Philippine Drug Enforcement Agency (PDEA) 8.
Si Supt. Ricky Reli, hepe sa Baybay Police, niila sa mga suspek nga sila Cresilda Jose - Omega; John Harris Omega; Arnel Gloria ug Mark Anjoe Pardillo.
Ang upat nasikop sa buy bust operation sa Zone 4, San Mateo St., Baybay City.
Nasakmit gikan sa mga suspek ang unom ka mga pakete sa gituhoang shabu, duha niini dagko nga pakete, pharaphernalia ug salapi.
Ang Baybay City gideklarar nga drug free apan padayon ang monitoring sa kapulisan sa posibleng pagsulbong sa mga bag-ong giila nga drug personalities.
Samtang sa Kananga Leyte, usa ka alyas Dodong Paslak ang napaslak na usab sa selda human masikop sa buy bust operation.
Giila ang suspek nga si Reynaldo Cuña, alyas Dodong Paslak, anaa sa hustong edad.
Matod ni Police Chief Inspector Jimmy Boy Balasanos, hepe sa Kananga Police Station, nakadawat sila og report sa ilegal nga kalihukan sa suspek busa ilang gipanid-an.
Alas 6:30 sa buntag, Dominggo, Pebrero 3, 2019, gilusad sa Kananga Drug Enforcement Unit ang buy bust operation sa Public Market, Larrazabal St.
Human sa transaksyon sa poseur buyer ug sa suspek, dali nga gipalibotan sa DEU si Cuña.
Nasakmit ang tulo ka mga pakete sa gituhoang shabu ug salapi. Nasayran nga napriso na kaniadto sa Matag-ob Leyte si Cuña tungod sa ilegal nga drogas apan nibalik kini sa ilegal nga kalihukan.
Nagpasalamat naman ang kapulisan sa suporta sa lokal nga kagamhanan hinungdan nga ganado sila sa pagsikop sa mga drug personalities.