Team Pilipinas nagsagubang og problema; Guiao nabalaka

Gihampak og problema ang kampanya sa Team Pilipinas sa nagkaduol nga 6th window sa FIBA Worlc Cup Asian qualifiers nga nakapabalaka og insakto ni national coach Yeng Guiao.

Aduna na la’y kapin sa usa ka semana ug moasdang na ang Team Pilipinas sa Doha, Qatar apan hangtod karon, wala pa sila nakasugat og tune-up game.

“I’m very concerned because can you imagine the only time we’ll see them compete is in the game itself,” matod ni Guiao sa interbyu sa Spin.ph.

“So that’s a big concern. But we couldn’t find any other solution to that problem.”

Ang Team Pilipinas nakatakda untang makigduwa sa Alab Pilipinas sa usa ka exhibition game apan kalit lang miatras ang defending champions sa ASEAN Basketball League (ABL).

Tungod niini, naahat ang Team Pilipinas nga mag-unay na lang og duwa aron maanad og insakto si naturalized player sa sestima ni Guiao.

Hinuon naninguha sab si Blatche ug miapil kini sa praktis sa duha ka teams sa Philippine Basketball Association (PBA) nga mao ang NLEX Road Warriors ug Rain or Shine Elasto Painters nga pulos nagsunod sa sestima ni Guiao.

Si Guiao maoy kasamtangang coach sa NLEX ug kanhi coach sa Rain or Shine.

“We just have to work with those limitations. Yung practice niya with NLEX and earlier with Rain or Shine, malaking bagay na yun. Kung hindi natin gagawin yun kulang na kulang talaga sa oras,” pasabot ni Guiao.

Gawas nga posibleng dili sila makaduwa og tune-up game, naangol sab ang kumagko sa kamot sa usa sa sinaligang pointguards sa Team Pilipinas nga si Paul Lee. Hinuon gitataw ni Lee nga andam niyang antuson ang sakit aron makatabang siya sa Team Pilipinas.

“Medyo nananakit pa pero iwas iwas na lang,” batbat ni Lee. “Kahit na may nararamdaman tayo, ilalaro na natin yun.”

Ang Team Pilipinas, nga adunay 5-5 nga rekord, moasdang sa Qatar karong Pebrero 21 dayon sa Kazahkstan karong Pebrero 24.