Tricycle lane dili pa kadugangan: Radaza

Kini nunot sa pagbutang ug tricycle lane sa Barangay Basak sa dakbayan sa Lapu-Lapu sa miaging semana nga maoy nabantayang nakahatag og gamayng kaluag sa dagan sa trapiko sa dapit.

Ang dapit maoy usa sa mga dapit sa dakbayan nga masinati ang grabeng kahuot sa dagan sa trapiko panahon sa kabuntagon ug kahaponon o sa dayong padulong ug pauli sa mga trabahante ug estudyante sa ilang obligasyon.

Matod sa Mayor nga maglisod pa sila sa pagkakaron pagdugang og tricycle lane sa ubang bahin sa dakbayan sanglit ang ubang dalan sa dakbayan nahulog na man nga mga national highway.

Kahinumdoman nga nimando ang Department of Interior and Local Government sa mga Local Government Unit LGU lukop nasod sa pagdili gayud sa mga tricycle nga makabiyahe sa mga national highway sa uwahing bahin sa tuig 2018.

Gawas sa Basak aduna usa’y mga biyahe sa tricycle sa mga dalan sa Brgy Maribago ug Pajac apan sa pagkakaron wa pa’y plano sa pagbutang ug tricycle lane niining mga dapita sanglit kasagaran sa giagian niini mga interior road.

“Atong gi-establsih asa ang mga areas kung moingon ka’g higway di gayud pwedi ang tricycle only for those city streets and the interior maoy mabutangan.” dugang niya.

Ang katong sa Maribago sa may Savemore naa man nasa highway, ang diri sa Pajac going to Maribago road ug sa Bangkal sa interior side mao nay mahimong masudlan” pagpasabot ni Radaza.

Nakauyon ra hinuon ang mayor sa resulta sa pagbutang ug tricycle lane sa Basak sanglit ang mga pribadong sakyanan diritso na sa ilang biyahe sanglit wa nama’y mga tricycle nga mosal-ot sa ilang agianan.

Giklaro sa mayor nga gawas sa tricycle mahimong makapahimus usab ang mga motorsiklo sa tricycle lane kung sa ilang tan-aw apike ang lane alang sa 4-wheel vehicleS.

Wala pa usab hinuo’y plano ang dakbayan pagbutang ug motorcycle lane sa mga national highway sa dakbayan nga dili mahimong mabutangan ug tricycle lane.

“Overtake at your own risk lang sa” pahimangno sa mayor.