Don’t let me be lonely
Didto sa unahan, puwahong ang kahayag sa adlaw, nagtimailhan nga hapit na moabot ang gabii. Miginhawa ko pag-ayo dayon kong tindog. Gipapha ko sa akong palad ang sampot sa gisul-ob kong short pants kay dunay namilit nga mga balas. Nagyaka man gud ko sa baybayon.
Hinay kong naglakaw palayo sa baybayon. “Clarissa!” Nakahunong kog lakaw ug mitan-aw sa direksiyon diin nadungog ko ang tingog nga nagsangpit sa akong ngalan. “Ikaw man diay, Nil.” Mipadayon kog lakaw. Mitapad si Nilo nako. Hinay sab siyang naglakaw, morag iya lang giagad ang akong mga lakang.
“Ganina ra tika nakita dinhi, Clar, pero wa tika tugawa kay klaro man nga duna kay gihunahuna pag-ayo.”
“Si Alex. Siya ang akong gihunahuna, Nil.”
“May problema ba sa inyong relationship?”
Mihunong ko paglakaw. Milantaw ko sa lawod. Nagdagtom kini kay gabii na man gyud. Gitan-aw ko si Nilo ug gitando ko siya. Mipadayon ko paglakaw.
“Duha ming girls sa iyang kinabuhi. I trust him very much. Wa ko magtuo nga duna diay siyay laing uyab. Ang akong gituhoan nga ako ra ang iyang love.”
“Dugay na kong nakahibawo ana, Clar, pero wa ko motugan nimo. Gusto nako nga ikaw mismo ang makahibawo ani.”
“Nakita ko sila sa akto kagahapon sa dayon ko nang pag-adto sa North Bus Terminal. Nag-holding hands sila nga naglakaw sa dalan Colon. Diha man ko mag-atang og kasakyan nga dyip paingon sa terminal. Malipayon kaayo sila.”
Gilingi ko si Nilo. Kauban sila si Alex sa gitunghaang university. Klasmet pa gyud sa daghang mga subjects kay parehas man ang kurso nga ilang gikuha. Graduating na sila sa Electrical Engineering. Samtang ako, sa laing university nag-eskuwela ug third year na sa gikuha kong kurso nga Business Administration.
Usa ra ka lungsod ang gipuy-an namo ni Alex, every weekend ming mopauli sa among lungsod, kada Sabado sa gabii. Nagpuyo mig boarding house sa siyudad.
Wa dayon ko mosulod sa sala sa among balay sa ako nang pag-abot. Duol sa dagat ang among balay. Gidapit ko si Nilo sa pagpasulod.
“Di na lang, Clar. Mangadlawon ka ugma?”
Mitando ko. Domingo karon. Ugma Lunes na ug klase na sab. Gisundan kog tan-aw si Alex nga mibiya nako. (SUMPAYAN)