TITLE FIGHT ALANG NI DAVE: GERRY P.
World title fight maoy gitagana ni kanhi world boxing champion Gerry Penalosa alang sa iyang pag-umangkon nga si Dave Penalosa kon kini makakulit og impresibong kadaugan batok ni Marcos Cardenas karong Pebrero 16 didto sa SM North Skydome didto sa Kaulohan.
Kini maoy gipasalig ni Gerry kinsa usa na karon ka promoter ug maoy chief executive officer sa GerPenz Promotion atol sa
interview sa Superbalita. Dako ang iyang pagtuo nga modaog si Dave ning maong awaya apan kinahanglan nga kini usa ka impresibo nga kadaugan aron kahatagan niya kini og world title fight.
“Tan-aw nako ma knockout ni niya. Kon impresibo ang daog, world title fight ang sunod natong lihukon,” matod ni Gerry.
Hinuon giangkon ni Gerry nga sa pagkakaron layo ra kaayo ang rating sa iyang pagumangkon.
Apan sa higayon nga modaog kini masulod na kini sa Top 15.
“Layo iyang rating pero kun modaug, masulod siya sa top 15 ratings. Atong target si Oscar Valdez,” dugang ni Gerry.
Si Valdez, 26-0, mao karon ang naghupot sa WBO featherweight title.
Sa iyang bahin, gipadayag ni Dave ang iyang kaandam sa maong away.
Bisan pa man og nakabintaha si Cardenas sa eksperiyensiya, apan wa kini hatagi niya og gibug-aton. Wa siyay
pressure nga gibati.
Gani iyang gitug-an nga nalipay siya nga si Cardenas ang iyang nakontra tungod kay makatabang kini sa pagdevelop sa iyang career.
“Ok ra akong training, wala sad ko nagkumpyansa sa akong timbang nagtraining dayun kog hinay-hinay paghoman sa akong last fight, gi-estudyohan usab namu ang lihok sa among kontra. Wala ko mangita ug knockout aning duwaa, pero og mokumpyansa siya akong gud siyang tumbahon,” matod ni Dave, anak ni kanhi usab world champion Dodie Boy Penalosa.
Sa uwahi niyang away niadtong Oktubre sa niaging tuig, gi-knockout ni Dave (14-0) si Twalib Tuwa (21-5-2) sa Tanzania sulod sa duha ka round.
Apan batok ni Cardenas gipaabot nga makasinati si Dave og malisod nga pagsuway tungod sa eksperiyensiya niini.
Sa uwahing tulo ka away ni Cardenas, pulos iyang gipang-knockout ang iyang mga kontra. Hinuon dili kini mga dekalidad.
Si Editor Villamor, ang chief trainer sa Ala Boxing Gym, mipadayag nga nindot kining maong panagsangka.
Adunay kasinatian si Villamor ni Cardenas sanglit nakontra man kini sa ilang kanhi batos nga si Genesis Servania.
“Parehas ra sila. walay nakabintaha puros naa sila kusog ug abilidad. Deperensiya lang sa total number of fights,” matod ni Villamor.
Pero sama kang Gerry, si Villamor nagtuo nga si Dave maoy moguwang mananaog, desisyon man o ma-TKO.