LTFRB gihangyong database bag-uhon
Nihangyo ang usa ka opisyal sa industriya sa transportasyon sa lalawigan sa Sugbo sa Land Transportation Franchising and Regulatory Board nga i-update ang database sa aktwal nga ihap sa mga sakyanan nga nag-function ug nagdagan pa sa kadalanan.
Sigon ni Julito “Julie” Flores, chairman sa Cebu Provincial Bus and Mini Bus Operators Transport Cooperative (CPBMBOTC), giingong naapil gihapon og ihap sa database system sa LTFRB 7 ang mga bus ug mini bus nga wala na magdagan, gubaon ug sobra na sa 15 ka tuig ang pangidaron.
“Usahay ang database sa LTFRB 100 units gadagan aning rotaha but ang actual ani kay 50 na lang kabuok. Kon imong adtuon sa ilang garahe naay daghan didto galubog. Mga disabled vehicles naa, daghan kaayo, wala na magserbisyo,” pahayag ni Flores, konsehal sa lungsod sa Barili, dihang nahinabi sa Superbalita Cebu.
Siya nipasabot kinahanglan nga ma-update ang sistema sa ahensiya sa aktwal nga ihap sa mga bus nga aktibo nga nagdagan aron mahibaw-an kon pila ka bus ug mini bus ang angay nga idugang sa mga rota labi na nagkadaghan ang mga pasahero nga mamauli.
Si Eduardo Montealto Jr., regional director sa LTFRB 7, niangkon nga wa sila’y control sa database sa ilang buhatan sanglit ang ilang ulohang buhatan ang naggam ug nagdumala niini. Apan duna silay kaugalingong inisyatiba aron mahibaw-an kon pila kabuok units sa bus ug mini bus ang aktibo pa ug namasahero pa diin matag buwan sila mopadala og report bahin niini ngadto sa ilang central office.
“Tanan demonitions naa ana. Dili mabalaka kay nailhan man na namo kay duna tay ginatawag nga inactive. Pag-abot sa certain period ana, one year or two years, i-mark na dayon sila nga abandon og dili na sila mag-renew,” pasabot ni Montealto sa buwag nga pakighinabi ning mantalaan pagka Sabado, Pebrero 9. Apan sigon niini dunay uban nag-renew sa mga prangkisa sa mga sakyanan bisan og gubaon na ang ilang units aron makapalit og bag-o.
Ang director nipaneguro nga regular ang ilang pagpanginspeksyon sa mga garahian sa kompaniya, operator o kooperatiba sa mga bus ug mini bus, apan random lang sanglit kuwang sila og tawo ug daghan og gimbuhaton ang ilang buhatan.
Si Joseph Kong, operator sa JRK South Transit nga magbiyahian sa siyudad sa Carcar, ug mga lungsod sa Sibonga, Aloguinsan, ug Barili, nisaysay nga dihang nagsugod pa lang siya sa maong negosyo pipila ka tuig na ang nakalabay, 100 ka units sa bus ug mini bus ang mamasahero sa Carcar.