Comelec inutil
Maka-ingon ta usahay nga walay ngipon kining Commission on Elections (Comelec) sa pag-implementar sa mga balaod kabahin sa eleksiyon. Walay ngipon. Pangag. Kay ngano man? Tan-awa ra god og unsay gihimo aning mga bentahosong kandidato. Wala pa gani magsugod ang official
campaign period, grabe na ang kampaniya. Karon pang Pebrero 13 magsugod ang campaign
period alang sa mga milansar sa pagka-senador ug partylist
group. Samtang sa Marso 29 pa alang sa local candidates apil na ang mga milansar pagka-kongresista.
Pero kon imong pangutan-on ang mga pulitiko, mo-ingon sila nga wa pa sila mangampaniya kon dili nakig-himamat lang sa mga botante. Nagpulong-pulong
lang kuno sila. Porbida kinsa man ang ilang ilaron? Nagkatag na ang mga campaign materials nga wa sa insaktong lugar o mga poster designated areas.
Ang Comelec maoy mobutang og mga poster designated areas sama sa barangay halls ug public places.
Pero ang supporters sa mga kandidato nibutang o nibitay sa mga posters sa mga punuan sa kahoy, poste sa kuryente ug
private properties nga wala gani mananghid sa mga tag-iya. Naa pay ilang posters sobra kaayo sa size nga gimando sa Comelec. Dayag kaayo nga abuso. Maayo ra ba og mga guapo ug guapa sa ilang mga hulagway. Ang ubang mga babayeng kandidato klaro kaayong photoshop ang mga litrato aron moguapa.
Ang uban nga adunay dakong budget nag-advertise na gani sa radio ug television. Pero
introduction pa lang kuno. Wala pay ‘vote’. Hinoon, wala may prohibition o wala man gidili. Pero klaro ug tataw kaayo nga giliko-liko lang ang balaod. Aw, kadtong mga kandidato nga walay igong budget, wala gyuy mahimo kay dili man usab libre ang publicity pinaagi sa media. Ari na lang sila sa social media.
Estriktuhon unta sa Comelec ang balaod aron patas ang tanan. Pero kon istriktohon pod, tan-aw nako ma-disqualified halos tanang kandidato kay halos nanikas ug namintaha ang tanan. Niaygoy uban labi pa ang maka-afford nga mogasto gyud og maayo aron lang masiguro ang kadaugan. Kining eleksiyon lagi kuwartahay.Kana lang pagpamalit og mga boto, ambot, kon kanus-a pa na mahunong.