Pork Barrel

Nilusot gyud ang P3.7 trilyones nga budget alang sa 2019 diha sa Senado bisan pa man sa mga alegasyon nga nanambok kini tungod sa dugang pa gyud nga giingong pork barrel funds alang sa mga kongresista ug mga senador.

Kinse ka mga senador ang uyon sa budget samtang lima ang supak. Sa sayo pa, nilusot ang maong budget sa bicameral committee nga ginsakpan sa mga representante sa Ubos Balay Balauranan ug sa Senado.

Apan lima ka mga senador nga wala makauyon sa maong budget tungod sa giingong pork barrel nga gideklarar na man unta kin inga illegal sa Korte Suprema kaniadto pa sa panahon ni Presidente Noynoy Aquino.

Lalim bay gidugangan sa mga kongresista ang budget og P20.7 bilyones. Dayon ang Senado nidugang sab og P25.4 bilyones. Ang bicam nibubo pa og P274 milyones. Ang total sa pork barrel nga gidugang niabot og P46.4 bilyones.

Niguwa na karon nga magtudtod na lang ang mga kongresista ug mga senador nga nidugang og mas dako nga pork barrel.

Ato man tuod gisalikway ang administrasyon ni PNoy kaniadto ug usa sa mga isyo mao ang pork barrel. Kining gibuhat sa Kongreso nagpakita lang nga wala diay kausaban.

Maayo na lang kay dunay mga senador nga wala makauyon sa nahitabo ug maoy atong gilauman nga mobisto sa mga detalye niini.

Manghinaot kita nga kining maong budget tangtangan sa Malakanyang sa tambok pinaagi sa presidential veto.

ADUNAHAN

Dugay kaayo makadesisyon ang kapulisan kon ila bang ipatawag dayon imbestigahon ang uyab ug mga barkada ni Ashley Abad, ang namatay tungod sa giingong overdose sa party drug atol sa usa ka party sa miaging Sinulog.

Nagkaklaro karon nga daw nagkinto ang kapulisan kay mga adunahan man ang mga pamilya niining mga bataa. Lahi ra ang mahitabo kon ang nalambigit gikan pa sa mga urban poor area kay kon di dayon ibalhog sa bilanggoan, kuyaw pa matokhang.

Angay unta nga ipakita sa kapulisan nga sila makiangayon sa ilang pagtratar sa mga adunahan ug mga kabus.

30 KA TUIG?

Nakasulat na ko niining maong punto dugay na. Apan nagpadayon gihapon pag-insister ang oposisyon sa Syudad sa Sugbo nga 30 ka tuig nga mayor si Mayor Tomas Osmeña.

Bisan unsaon pag-insister og between the lines, klaro man nga sayop ang math sa oposisyon. Ngano kaha sab nga ilang baruganan mao ang pagbale-wala sa mga termino nilang Alvin Garcia ug Mike Rama?