Don’t let me be lonely
Gibasa ko ang text message ni Alex. “Magkita ta sa suki natong fast food unyang lunch time.” Dali ra kong nakadesisyon pagkahuman kog basa sa text message ni Alex. Gipawong ko ang akong selpon. Wa ko tubaga si Alex. Para sa unsa pa? Angay lang gyud kong maglikay na niya. Di siya ang lalaki nga angay kong higugmaon.
Duha ang iyang nawong. Wa siyay usa ka pulong. Di makamaong motuman sa iyang saad.
“Promise, Clarissa, ikaw ra ang babaye nga akong mahalon.”
Mora kog kasukaon samtang naghunahuna sa gisaad ni Alex nako dihang gisugot ko na siya. Giluod ko sa iyang gipanumpa nako.
Human kog ilis para sa pag-adto sa eskuwelahan, igo lang kong miinom og gatas. As usual, adto na sab ko mamahaw sa school canteen. Nakalitan ko kay diha si Alex sa gawas sa main gate sa eskuwelahan sa akong pag-abot. Aw, klaro gyud nga naghuwat siya nako. Midiretso kog sulod sa gate. Wa ko tagda si Alex.
Kusog kong milakaw. Wa ko siya lingia. Unya mitingog ang akong selpon. Si Alex ang nagpadalag message.
“Pakigsulti nako kon unsay akong sala.”
Wa ko replayi si Alex. Milargo ko sa akong classroom. Mokaon pa unta ko sa canteen apan nawad-an kog gana tungod sa paghasol ni Alex nako.
“Sus, atubanga siya, uy, Clarissa. Wa pa ka makahibawo kon unsa tong bayhana sa kinabuhi sa imong boyfriend? Basig paryente lang to ni Alex.”
Gitug-anan ko si Salome, akong cousin, sa akong problema. Klasmet ko siya. Diha na siya sa klasrom sa akong pagsulod. Wa pa moabot ang among propesor. Nagtupad mig lingkod.
“Di to niya paryente, Salome. Klaro nga uyab ni Alex ang girl. Sweet kaayo sila.”
“Kon mao, pakigsultihi siya. Kon makigbuwag ka niya, angay lang gyud nga makig-estorya ka niya. Kon di ka makigbuwag niya sa personal, nagtuo siya nga uyab gihapon mo.”
Wa ko makatingog. Nahunahuna nako nga husto si Salome. Di ko angay likayan si Alex hangtod sa hangtod. Angay gyud tuod kong makig-estorya niya aron masulti ko niya ang unsa man nga gusto kong masayran gikan niya, ug kon unsa man ang akong desisyon bahin sa among relasyon.
(SUMPAYAN)