GIPANGA SA SAGING
Dihang nagsabak si Maryflor Villanueva-Ampong, siya nagtuo nga usa ka lalake ang iyang gimabdos.
Matod sa 38 anyos nga inahan nga daghan ang nagsulti nga usa ka lalake ang iyang gisabak kay hait ang porma sa iyang tiyan.
Dihang walo ka buwan na ang tiyan, siya gi-ultrasound, ug gipahibawo kini sa doktor nga usa ka babaye ang iyang ipakatawo.
Apan, wa siya motuo niini. “Di jud ko motuo nga babaye siya. Diha nako nituo nga nanganak nako niya,” asoy ni Maryflor.
Niadtong Enero 23, 2015, iyang gihimugso ang ikaduhang anak sa Margarita Birthing Center sa Gorordo Avenue, siyudad sa Sugbo pinaagi sa normal delivery.
Ang bata ginganlan niya og Honey Shey Ampong,
Siya nisaysay nga sa dihang nagmabdos siya sa ikaduhang anak, hilig siya mokaon og saging labi na ang nilung-ag ug banana cue.
Tumang kalipay ang iyang bation kon makakaon na og saging nga daw sa kini ang iyang gipanga sa bata.
Sigon ni Maryflor ang iyang pagkahilig mokaon og saging nadala na usab sa iyang duha ka mga anak, si James Yohan, ang kamaguwangan, ug Honey Shey.
Niadtong Enero 23 ning tuiga, gisaulog ni Honey Shey ang ikaupat nga kasumaran sa iyang adlaw nga natawhan sa usa ka salosalo sa mga miyembro sa ilang pamilya ug kabanay sa ilang panimalay sa Barangay Inayawan, dakbayan sa Sugbo.