SMB, Magnolia mag-rematch

Mga duwa karon:

4:30 pm- Phoenix batok

Rain or Shine

6:45 pm- San Miguel batok Magnolia

Magpinaksitay sa main game karong gabii ang finalists sa miaging season nga mao ang defending champion San Miguel Beermen ug Magnolia Ang Pambansang Manok Hotshots sa Philippine Basketball Association (PBA) Philippine Cup sa Araneta Coliseum.

Ang Beermen, nga adunay 3-3 nga rekord, ningbangon gikan sa duha ka sunodsunod nga kapildihan pinaagi sa pagmakmak sa Blackwater Elite, 93-79, sa miagi nilang duwa.

Samtang ang Hotshots mosubay pa pag-ambak sa han-ay sa kadaugan human sila nasubhan og kapildihan batok sa Talk N’ Text KaTropa, 75-80.

Sa pagpangulo sa Sugbuanong higante nga si JuneMar Fajardo, ang Beermen nagkinahanglan lang og lima ka mga duwa aron idispatsar ang Hotshots sa best-of-seven finals series sa Philippine Cup sa miaging season.

Labing seguro, wala na nakalimot ang Hotshots niini ug seguradong nagpilit sa ilang dughan ang tinguhang makabawos.

Sa premirong duwa, magkombati ang mga lider nga mao ang Phoenix Pulse Fuel Masters ug Rain or Shine Elasto Painters.

Usa kini sa labing giatangan nga kombati ning maong komperensya.

Ang Fuel Masters maoy labing init nga team sa kasamtangan ug nipatigbabaw kini sa standing nga wala’y pilde sulod sa lima ka mga duwa.

Ang Elasto Painters naa sa ikaduha nga nagbitbit og 5-1 nga rekord.

Kon modaog ang Fuel Masters ning sangkaa, sila maoy labing unang makaseguro'g luna sa quarter-finals.