Bubble Run 3 karong buntag sa Talisay
Kapin o kulang, moabot ngadto sa 1,000 ka mga local runners ang magtigi karong buntag sa dihang mosikad na ang Bubble Run 3 sa St. Scholastica’s Academy-Tabunok, Talisay City.
Ang maong fun run nga giorganisar nila ni Fr. Adriano Ocariza ug Pepito Lim maoy giisip nga usa sa mga kalihukan sa alumni homecoming ug grand jubilee celebration sa Class ‘69, ang unang batch nga nakakompleto sa high school sa maong tulonghaan.
Kini manukad diha sulod sa campus sa SSA sa barangay Tabunok sugod sa alas singko sa buntag ug motadlas didto sa barangay Lagtang dayon pabalik.
Ang mga partisipante gibahin ngadto sa duha ka kategoriya. Kini mao ang 3-kilometer ug 6-kilometer run.
Ang registration fee sa 6-k nagkantidad og P450 samtang P350 sa 3-k. Gawas sa singlet, dala na usab niini ang race bib ug snacks.
Hinuon, gipahibawo ni Lim nga ang mga estudiyante, mahimong makaparehistro lang sa kantidad nga P100 apan wala kini singlets.
Kon kahinumdoman, ang unang St. Scholastica’s Bubble Run gipahigayon niadtong 2011 ug gisundan kini niadtong 2014.
Sa dili pa sugdan ang lumba, bas-on una ang mga partisipante, ug sa pagsugod niini moagi kini sa dapit nga adunay nagbuwa ug ingon man sa mga may colored powder.
Si Ocariza mipasabot nga ning higayona, ilang giusab ang rota sa maong lumba.
Dili na kini moagi pa sa main road sa Tabunok aron malikayan nga makatampo kini sa dagan sa trapiko.
Ang modaog sa 6-k men’s division, makaangkon og P3,000, samtang ang runners-up makabulsa og P2,500, P2,000, P1,500 ug P1,000. Mao usab kini ang sa women’s division.
Sa 3-k men’s ug women’s, ang matag makampiyon makabulsa og P2,500, ug P2,000, P1,500, P1,000 ug P500 ang mga pasunod alang sa matag runners-up.