NAPATAY ‘KARNAPER, TULISAN, PUSHER’

Giingong nalambigit sa pagpangawat og motorsiklo, tulis, akyat-bahay, gun-forhire, ug illegal nga drugas ang napatay sa kapulisan human giingong nisukol sa buy bust operation Sabado sa kaadlawon, Pebrero 16.

Ang napatay nga giila nga high value target (HVT) giingong nisukol sa kapulisan atol sa buy bust operation sa Sitio Mananga II, Barangay Tabunok, dakbayan sa Talisay mao si Rolando Valdez, alyas Dugyot.

Si Chief Insp. Ardiolito Cabagnot, deputy chief sa Talisay Police Station nga nahinabi sa Superbalita Cebu, nagkanayon nga si Valdez nakabantay nga pulis ang gikatransakyon.

Giingong niibot kini sa iyang armas ug namusil apan wa makaigo. Gibaslan siya sa pulis sa pagpusil hinungdan sa iyang kamatayon.

Nasayran nga taga Bulacao, Talisay si Valdez, kinsa giingon nga nagtago sa Sitio Mananga II, Tabunok kay gipangita sa kapulisan.

Matod ni Cabagnot nga positibo nga giila si Valdez nga usa sa mga suspek sa pagpusil kang PO1 Jayrlord Taping niadtong Nobiyembre 2018 sa Sitio Mananga 2, Brgy Tabunok, Talisay City.

Si Taping naangol ug napasidunggan sa Police Regional Office (PRO) 7.

Laing tulo ka mga suspek sa mao nga hitabo napatay usab sa kapulisan sa lain nga operasyon.

Si Valdez giingong manggamit og mga bata aron manaka og mga balay.

Lakip sa na-recover sa crime scene ang usa ka armas nga gigamit ni Valdez sa pagsukol sa mga pulis, 15 ka pakete sa shabu nga nagkantidad og P4,080 ug mga bala.