Partially solved kuno
Daw og sa mikid-op ang dalan sa pag-ila kon si kinsa ang tinud-anay nga mga mamumuno sa nahitabong pagpang-ambush sa mga Reluya niadtong Enero 22 sa barangay Lawaan, dakbayan sa Talisay. Kini human nga ang duha ka pamilya sa laing biktima nga naapil sa maong pagpangambus dili diay interesadong mopasaka og kaso batok sa mga suspek nga gipanghinganlan ni Police Regional Office (PRO) 7 Chief Debold Sinas.
Ang rason mao nga nangahadlok sila nga tingali og sila na hinuon unya ang puntariyahon sa mga suspek nga hangtod karon wala pa madakpi ug wala pa usab masayri og asa nagtago-tago.
Gitumbok ni Sinas ang mga notadong personalidad nga dugay na usab nga pinangita sa mga tinugyanan sa balaod tungod sa laing kaso.
Kini mao sila si Jerome Labitad, Felix Abacajan Jr. kinsa nag-atubang og kasong murder ug giingong nalambigit usab sa illegal drugs, ug laing upat nga padayon pang nagtago-tago.
Makasabot ta sa desisyon sa pamilyang Allan Bayot, driver, ug sa kabanay usab ni Ricky Monterona, ang local economic investments and promotions officer sa maong lungsod, nga luwan usab sa van nga gisakyan ni San Fernando Mayor Neneth Reluya ug sa iyang bana nga si ABC president Ricardo “Nonoy” Reluya atol sa ambush. Gusto nila nga dili sila malambigit sa kagubot.
Pero ang posibling punto mao nga kinsa may interesadong mokiha sa mga suspek nga wa gani igong imbestigasyon ang mga kapulisan aron pagtino kon sila ba gyud tinuora?
Dili pa lang ni mao, madumtan na hinuon sila.
Si Sinas mipasiatab nga partially solved na ang maong kaso kay ang description sa mga witness nihaom ngadto sa grupo ni Labitad. Kahilaw sab sa pangankon ni Sinas. Wa pa madakpi ang suspek, wa pa gani mataral sa hukmanan, unya partially solved?
Tell that to the marines, Sir Sinas, Sir.