Kinsay amahan

Dear Noy Kulas,

Tawga lang ko og Ice, 35 years old ug nagtrabaho na sa usa ka opisina. Di ni akoang problema but concern kaayo ko.

Naa koy very close friend nga nakauyab og pari. Ambot asa ni siya na-assign but di siya pirme diri sa Cebu. While on sila, nakauyab ang akong amiga og rich nga foreigner kay gwapa lagi sab ni siya. Asian ang foreigner but di ko mosulti sa nationallity. Pinoy ra og nawong ang iyang bana but filthy rich. Nagsabot sila nga ang akong friend ari ra diri sa Cebu magpuyo. Nisugot ra ang iyang husband.

Ang akong nalainan kay nagpadayon ang ilang relasyon sa pari. Nimabdos ang akong friend ug nanganak. Nagtuo intawon ang foreigner nga iyaha ang bata pero sa akong tan-aw, liwat kaayo sa pari ang nawong. Nakonsensya na ko kay ako ang tigtabon sa akong amiga sa iyang mga kabuang.

Noy, unsa may akong buhaton? Maglisod ko og sulti niya kay basin mag away mi. Ako ra ang nakahibawo sa iyang secret.

Please tambagi ko unsay akong buhaton.

ICE Ice,

Kon unsay naa sa imong huna-huna, isulti kay isip best friend, imong responsibilidad ang pagsulti kaniya kabahin sa iyang sayop. Ayaw siya pasagdi ug tabuni sa di maayo niyang gibuhat kay pareho mong duha, bakakon. Di ra ba maayo ang duha niya ka mga buhat. Nangabit siya and sa tanang tawo, pari pa gyud. Bisan tuod kon di ikaw ang nagbuhat, sama ra sab nga parte ka sa iyang binuang kay nitabon ug nikonsinter ka.

Pakig-estoryahe ang pari nga palay-an na ang imong amiga aron di mo siya isumbong o I report sa iyang kongregasyon. Kay kon mahibaw-an nang paria, dako ang posibilidad nga palagputon na siya sa iyang kaubanan kay di ordinaryo ang iyang kalapasan nga nahimo.

Bitaw, kon di madalag estorya, mas maayong magpalayo ka na lang nila. Ayaw himoang kabahin ang imong kaugalingon sa ilang mga sala.

NOY KULAS