As long as he needs me

Gitan-aw ko ang akong hitsura sa dakong salamin sa aparador. Dugay kong gitutokan ang hubo kong lawas. Unya nakapanghupaw ko. Gianugnan ko sa akong lawas nga gidayeg sa daghang mga lalaki, gipangandoy nga angkunon ang akong gugma. Apan nawad-an kog kontrol sa pinitik sa akong kasingkasing.

Unya nag-spray kog mahalong perfume sa akong liog, sa akong dughan, sa akong ilok ug sa ubos sa akong puson. Nangalisbo sa kahumot ang kuwarto. Nag-ilis kog miniskirt. Mapagarbuhon kong nagsud-ong sa kanindot sa akong lawas nga milutaw sa akong gisul-ob. Puti ug bigot ang akong mga paa. Ugdo ang akong sampot. Bus-ok ang akong duha ka dughan.

Mipahiyom ko ug milubyok ang kandiis sa tuo kong aping nga nakapasamot sa akong kaguwapa ug kamadanihon.

“Mosuroy na sab ka kuyog kang Jonathan, mao ba, Karell?’

Milingi ko kang Olga, kauban kong boarder sa usa ka mahalong boarding house sa siyudad. Kami rang duha si Olga ang nagpuyo sa maong kuwarto. Di double deck ang among higdaanan, kondili tagsa mig kama.

Usa ka nindot nga smile ang gitubag ko kang Olga. Parehas mig university nga gitunghaan, ug parehas sab mi nga third year college. Apan lain-lain ang kurso nga among gikuha. Mag-best friend gyud mi. Wa mi sekreto sa usag usa. Nagtug-anay mi sa unsa man nga nahitabo sa among kinabuhi labi na bahin sa among lovelife.

“Wa ka pa ba maanad,

Olga?”

Gipislit ko ang lamurok nga aping sa akong amiga. Nagkusmod siya.

“Wa ka bay pagtan-aw sa imong future, Karell? Wa ka ba maghunahuna nga ikaw ang alkanse anang imong subra nga pagsalig kang Jonathan? Sure ka ba gyud nga pakaslan ka niya inig kahuman ninyog eskuwela?” Mikatawa ko. “Nakasabot ko nimo, Friend. Concern ka nako. I appreciate for that. Thank you very much ani. Pero way laing laki nga para nako. Only Jonathan. He’s my one and only.”

Nakapanghupaw si Olga. Gikidhatan ko siya. Unya migawas ko sa kuwarto. Nadungog ko pa ang gipaagpas nga pahimangno sa akong amiga.

“Ayaw og kompiyansa kay basig mabuntis ka.”

Igo lang kong mipahiyom. Hagbay pa kong nag-amping nga di ko momabdos. Nagtumar kog tabletas sa pagpugong sa pagmabdos.

(SUMPAYAN)