4 KA MGA ‘DURUGISTA’ PATAY

ECSTASY ‘SUPPLIER’ SA CEBU; LAING 2 GI-SALVAGE SA TALISAY; TANOD SA DAANBANTAYAN ‘MISUKOL’

■ ECSTASY: Mao kini ang gituohang party drug Ecstasy nga maora lang og mga candy, apan makapatay diay kon malab-anan. Nakuha kini sa kapulisan gikan kang Ken Kenneth Rosales, 31, kinsa napatay sa Regional Operations Group (RSOG) 7 ug Philippine Drug Enforcement Agency (PDEA) 7 kay giingong nisukol. Kinsa kini si Rosales sa Ecstasy drug matrix sa kapulisan? Ang mga detalye sa pahina 2.

Upat ka gikatahapang mga durugista sa Sugbo patay sa lainlaing mga sirkumstansya sa managlahing mga oras ug dapit sa Biyernes, Pebrero 22.

Duha kanila napatay sa kapulisan samtang ang laing duha gituohang gipang-salvage.

Sa Dakbayan sa Sugbo, giilang tinubdan sa Ecstasy napatay sa buy bust operation sa Regional Special Operations Group 7, nga giabagan sa Philippine Drug Enforcement Agency 7 ug Drug Enforcement Unit sa Cebu City Police Office ala 1:45 sa Biyernes sa kaadlawon sa Barangay Zapatera.

Ang namatay sa Cebu City Medical Center (CCMC) mao si Ken Kenneth Rosales, 31, taga Tres Borces street, Barangay Mabolo, siyudad sa Sugbo.

Nakuhaan siyag daghang pinutos nga tabletas nga gituohang party drugs nga Ecstasy.

Lakip sa nakuha ang upat ka putos sa gituohang cocaine nga gibutang sa luyo sa iyang itom nga Volvo.

Matod ni Sr. Supt. Remus Medina, hepe sa Regional Intelligence Division sa Police Regional Office 7, unang nasikop ang iyang mga dealer nga silang Justin Anthony Jimenez, 23, ug Lorenz Jasper Yap, 21, taga Mabolo, mga tinun-an.

Sila nakuhaan og mga putos nga adunay sulod nga Ecstasy.

Sa imbestigasyon, sila nitug-an kinsa ang ilang supplier.

Nihimo dayon ang mga sakop sa RSOG 7 og follow up operation.

Ilang giteksan si Rosales nga mo order sila og laing Ecstasy nga dali usab dayon nisanong.

Didto sa dalan Sepulveda, Barangay Zapatera ang ilang gikasabutan nga mag-abot.

Apan sa pag-abot sa lugar, nakabantay si Rosales nga mga pulis ang iyang gikasabot, dali untang mosibat sakay sa iyang Volvo nga awto apan na-corner na siya sa mga sakyanan sa RSOG 7.

Inay mo-surrender mikuha kini sa iyang armas ug dayong pamusil sa mga pulis ug nahitabo ang pinusilay. Giigo ra unta siya sa mga pulis sa tiil.

Apan padayon nga namusil si Rosales hangtod nga gipusil na siya tumong sa lawas.

Gidali pa pagdala si Rosales sa Cebu City Medical Center apan dead on arrival.

Niadtong Hulyo 18, 2013 nasikop na si Rosales sa pagpamaligya gihapon og Ecstasy apan nakapiyansa.

BIGTIME?

Giila siya ni Medina nga maoy nag-supply sa party drugs sa mga drug dealer sa Metro Cebu. “Siya yung lumalabas na big time supplier ng Ecstasy dito sa Cebu. Tapos mayron pa siyang boss na hinahabol pa namin. Mayron pang mas mataas pa sa kanya at ang source naman ay galing sa Maynila,” matod ni Medina.

Nailhan na nila kinsa kining maong boss nga babaye nga naapil sa drug matrix nga unang namantala sa Superbalita Cebu ug SunStar Cebu.

Sa bag-ong matrix nga gipakita ang RSOG 7 sa Superbalita Cebu, si Rosales nabutang sa ikaduhang dapit, ubos sa big boss nga babaye.

Samtang silang Jimenez ug Yap iyang mga downline.

Giangkon nilang Jimenez ug Yap sa interview sa dyHP RMN Cebu nga mogamit sila og Ecstasy apan gihimakak nila nga ang drugas nga diha nila ilaha kay gisugo ra sila ni Rosales.

“Dili man to amoa, Boss, sa dealer man to. Iyaha man to. Kami ra man iyang gisugo,” matod ni Yap.

Sa dihang gipangutana kon kaila ba sila ni Ashley Abad ug Nel Spencer Tiu, wa sila makaila.

Apan nagtuo si Medina nga sa ilang grupo nikuha og supply silang Abad ug Tiu sanglit sila ang nag supply sa Sugbo.

Si Sr. Supt. Royina Garma, hepe sa Cebu City Police Office (CCPO), mopasubay sa mga cellular phone nga nakuha kanila ug makig alayon sa RSOG 7 aron mapaubos sa forensic test ang ilang mga gadget. “Maghanap tayo ng mga documents kagaya ng cellphone. That’s why we are investigating,” matod ni Garma. Aduna pay himuon nga follow up operation ang RSOG 7 uban ang kapulisan sa syudad sa Sugbo human sa gipangtug-an nilang Yap ug Jimenez.

GI-SALVAGE?

Duha mga lalake nakaplagang patay sa Sitio Ibabao, Brgy. Maghaway, dakbayan sa Talisay alas 4 sa kaadlawon sa Biyernes.

Nakadawat og tawag ang kapulisan sa usa ka concerned citizen kabahin sa duha ka lalaking iyang nakaplagan nga patay sa dalan.

Dali dayong girespondihan sa kapolisan ang maong lugar.

Mga biktima giilang sila si Mark Kernaez, taga Brgy.Lagtang, ug Gabby Gabisan,41, taga Brgy San Roque ,Talisay.

Matod sa mga lumolupyo nga mga alas 4 sa kaadlawon dunay silay nadunggang mga buto sa pusil.

Usa ka motorsiklo nga giingong gipanag-iya sa usa ka Juriel Minguito napalgan sa dapit.

Nakuha sa scene of crime operatives (Soco) sa crime scene ang 11 ka mga kabhang ug upat ka mga bala sa wa pa masayring armas.

Matod ni Talisay Police Chief Supt. Marlu Conag, mga drug personality sila si Kernaez ug Gabisan.

Busa nagtuo siyang may kalambigitan sa illegal drugs ang pagpatay kanila.

Samtang patay sab ang usa ka barangay tanod nga giingong drug personality human giingong nisukol sa kapulisan alas 4:30 sa kadlawon sa Sitio Sala, Brgy. Maya, lungsod sa Daanbantayan.

Si Christory Montiadora, alias Bhoyax, patay human giingong namusil sa mga pulis nga nironda sa iyang balay pinasikad sa search warrant.

Si Sr. Insp.William Homoc, hepe sa Daanbantayan Police Station nga nahinabi sa Superbalita Cebu, nagkanayon nga bitbit nila ang search warrant nga giisyu ni Judge Ruben Altubar,sa Regional Trial Court (RTC) 7 Branch 29, may kalambigitan sa illegal drugas.

Apan samtang naglingkod si Montiadora, nibunot kini sa iyang armas ug namusil sa kapulisan hinungdan nga nabawsan. /