2 ka mga kapitan nga BOPK nasikop sa 'paghupot' og ilegal nga armas

Duha ka mga barangay kapitan sa Dakbayan sa Sugbo nga mga sakop sa Bando Osmeña Pundok Kauswagan (BOPK) gidakop sa kapulisan tungod sa giingong paghupot og di lisensyadong mga armas.

Usa sa nasikop mao si Lusaran Barangay Captain Agustin Partulan, kinsa nakuhaan og mga paltik nga armas.

Dungan siyang gi-raid sa iyang duha ka mga barangay tanod nga sila si Renato Gocong ug Reynaldo Laguna.

Si Partulan naluwatan og search warrant sa korte nunot sa giingong paghupot og di lisensyado nga armas.

Samtang nasikop usab sa mga sakop sa City Mobile Force Company ang kapitan sa Barangay Calamba, konsehal ug barangay tanod nunot sa giingong paghupot gihapon og mga armas nga way lisensya.

Ang nadakpan mao si Barangay Victor Quijano alyas Jojo, konsehal Ramsy Mercado ug ang barangay tanod nga si Anthony Gingoyon.

Nagkadaiyang mga matang ug kalibre sa armas ang nakuha sa kapulisan sa balay sa kapitan.

Apan si Quijano hugot nga nanghimakak nga iyaha ang maong armas nga nakuha ilawom sa ilang kama.

Matod ni Quijano nga aduna siyay armas apan lisensyado.

Si Quijano mapasakaan lang sa paghupot og illegal nga armas, di kalapasan sa Commission on Elections (Comelec) gun ban kay sa iya mang balay kini nakuha.

Gani, niadto lang miaging adlaw migawas ang plastic sa iyang lisensya sa paghupot og armas.

Awhag ni Cebu City Police Director Royina Garma sa mga kapitan nga adunay armas nga way lisensya nga itahan kini.