Way lingi-lingi kung maoy makatalikod

Ako motuo nga mas taas og pasensya ang mga babaye kaysa mga lalaki apan kung kini mapuno na, di sab kini magduha-duha og lingi inig biya labi na kung tumang kasakit ang mahi-aguman.

Kung ang babaye na gali ang maka-desisyoin nga mobiya tungod sa mga balik-balik og grabing pagpang-abuso, bisag unsaon pa pagkumbinsir ug luhod-luhod pangayo og pasaylo, lisod na kini pabalikon.

Apan ang kalibutan padayong nagtuyok. Way di mahimo kung ang atong manunubos na ang magbuot.

Niadtong gusto pa nga magkabalik ang buot sa usag-usa, kini akong mga suhistiyon:

Wa magpasabot nga kung misaad na ang asawa nga di na modayon og biya, kung

padayon ang pagpang-abuso, mapisikal, emosyonal ,sekswal, pinansiyal o verbal, di gihapon kini magduha-duha og biya. Busa angay hinuktukan ang mga binuhatan og magusab sa abusadong kina-iya ug ngil-ad nga batasan.

Kung tinuod man gali imong gugma, paningkamoti nga makakita ka og paagi nga imong mapakita imong pagpangga ug interes nga kamo magkabalikan kay kung di ka magpasabot, kini siya magdahom nga wa siyay balor sa imong kinabuhi ug nga mabuhi ra ka bisag wala siya. Hatagi siya og panahon nga makapahunghaw sa gibati ug huna-huna og insakto.

Kung ikaw nakasala man ugali, andam sa pagpangayo og pasaylo ug paghinulsol sa imong mga kalapasan. Paninguha-a

nga maminus-minusan imong pagpamakak kung di man ugaling mapugngan.

Hatagi siya og bug-at nga mga rason nganong naninguha ug naningkamot ka nga kamo magka-balik para sa inyong kaugmaon ug pamilya.

Kung ugaling tinu-oray man ang gugma sa usag-usa, kamong duha andam nga mo sakripisyo para makab-ot inyong gitinguhang relasyon.

Hatagi og balor og importansiya ang iyang mga sugyot ug huna-huna bisag unsa pa kini ka simple o bulawanon.

Kalimti na ang mga nangaging mga kasakit ug sugod sa uno sama sa computer nga ipa re-boot.

Para nako, ang tinu-oray nga relasyon dunay pagsalig, pagsinabtanay, pagsabot, timos nga paghigugma ug respito.