Cortes ug Quisumbing

Mogimaw ang bulok sa politika kon magsingabot na ang eleksyon. Mangitag paagi aron pagkabig sa mga botante. Sugo sa kagaw sa politika sila Bernard Cabatingan ug Analin Maquilan mipasakag kasong plunder ngadto sa Ombudsman batok ni Rep. Jonas Cortes ug kaubanan pagbaligya og barato sa 3.5 ektarya nga katunggan sa Looc sa 2015. Nangunay usab pagduso sa maong kaso ngadto sa korte sa Mandaue sila Mayor Luigi Quisumbing ug Vice Mayor Carlo Fortuna. Tataw nga pamolitika ang pagpangamras nganong karon palang nga nagdanga-danga na ang piniliay.

Kampo ni Cortes milantugi nga dunay Dead of Sale pabor sa Ecodemcor basi sa probisyon sa Contract of Lease sa 1980 nga ang evaluation sa foreshoreland giagad sa DENR Administrative Order No. 9934 nga nagsitar og 50 pesos ang matag metro kwadrado. Ang maong luna sa dekada 90 kabakhawan nga gisanapan sa tubig. Gigastohan sa nagabang Ecodemcor og 75M pesos pag-reclaim. Midonar pa gyod ang Ecodemcor og dulan sa usa ka ektarya nga lote nga gigahinan og 42.8M pesos nga karsada nga walay gasto ang Mandaue. Gibuhatan og coastal road nga nakapaluag sa trapiko ug dili na mabahaan kay duna nay drainage. Basi sa Local Govt. Code ang nag-abang sa luna Ecodemcor maoy dunay katungod sa pagpalit nga kuhaan sa nagasto. Busa ang tanang kontrata nga gisudlan panahon ni Mayor Cortes lehitimo ug legal.

Naunsa man si Quisumbing nga mao may gibasol si Cortes sa nagpasad nga hospital waste sa kilid sa Butuanon river ug sa kadagatan sa Mandaue nga mihan-ok sa Lapulapu. Nagsugod sa paghipos sa mga basura ang Davao City Environmental Care sa 2014 panahon ni Cortes nga walay nalapas. Sa 2017 ug 2018 mao nay nag-isyo og mayor’s permit si Quisumbing. Dili nalang siya manghunaw iya untang sulbaron.

Pamintaha ni Quisumbing nga miduso og gahin 2.4B pesos sa 2019. Usbaw nga 330M pesos sa job order employees, 35M pesos financial assistance ug 45 M pesos donation. Hinoon wala laslasi sa konseho. Si ABC Pres. Ernie Manatad mipadayag nga gipamolitika ang 2019 budget. Iyang gipatugbaw nga dili sila rubber stamp sa mayor ubos sa prinsipyo nga check and balance.

Laing pamintaha ang pagpangutang sa bangko sa katukoran sa Government Center. Dili nalang maghisgot sa dakong komisyon apan maoy magsagubang og bayad ang mga magbubuhis. Pwede raman unta nga ipaagi sa Public-Private Partnership (PPP) nga walay gasto ang gobyerno. Samot nga gipademolis ni Quisumbing ang 29 ka mga balay sa Riverside, Looc nga dili tawhanon sanglit walay relocation.