Cebu City overall champion sa ika-28 nga higayon

Sa ika-28 nga sunodsunod nga katuigan, ang powerhouse Cebu City Niños milangkat na sab sa overall title sa 2019 Central Visayas Regional Athletic Association (Cviraa) meet nga nahuman kagahapon sa Dumaguete City.

Ang Niños nakahakot og kinatibuk-ang 73 ka gold medals, 57 ka silver medals ug 73 ka bronze medals aron iugbok pagbalik ang ilang domi- nasyon sa matag tuig nga kompetisyon sa Rehiyon 7.

Nakuha man tuod pagbalik sa Niños ang overall title apan dayag ang pagkunhod sa nahakot nilang mga bulawan kumpara sa miaging tuig sa Tagbilaran City, Bohol diin nakapundo sila og 114 ka gold medals.

Ang Niños nakabira og 57 ka gold medals, 36 ka silvers ug 51 bronzes sa secondary level samtang nakaangkon kini og 16 golds, 21 silvers ug 22 bronzes sa elementary division.

Ang ikaduhang dapit sikit nga giiluhan sa Bohol Province ug Lapu-Lapu City.

Naangkon sa Bohol Province ang ikaduhang luna human nakalangkat og gold medals ang ilang sepak takraw teams sa elementary ug secondary divisions.

Ang Bohol Province mihuman sa kompetisyon bitbit ang 44 ka gold medals, 53 ka silvers ug 51 bronzes sa kinatibuk-an.

Sikit nga nagsunod ang Lapu-Lapu City sa ikatulong luna nga adunay kinatibuk-ang 44 ka gold medals, 21 silvers ug 26 bronzes.

Naa sa ikaupat ang host Dumaguete City (37-42-39) unya ikalima ang Cebu Province (33-30-62).