BLATCHE, GILAS MITIPI SA QATAR
Masipang buto ang gihatod ni naturalized player Andray Blatche sa iyang pagbalik sa Team Pilipinas ug iya kining gituboy ngadto sa hingpit nga dominasyon batok sa host Qatar, 84-46, kagahapon sa kadlawon sa
6th window sa FIBA World Cup Asian qualifiers sa AlGhafara Sports Club MultiPurpose Hall sa Doha. Qatar.
Si Blatche, kinsa kanhi magduduwa sa National Basketball Association (NBA), nagpakatap og 17 puntos, 15 rebounds ug pito ka assists aron pangulohan ang kadaugan nga nagpabuhi sa paglaom sa Team Pilipinas nga maka-qualify sa FIBA Basketball
World Cup nga ipahigayon sa China karong Agusto.
Nagpabuto si Blatche og tulo ka three-point bombs sa
3rd quarter dihang gilampaso sa Team Pilipinas ang Qatar sa hinakutay og puntos, 31-9, aron kontrolahon sa hingpit ang kombati.
Si Marcio Lassiter nidugang og 14 puntos alang sa Team Pilipinas, nihatag og 13 puntos si Paul Lee, niamot og 11 puntos si Jayson Castro samtang nitampo og 10 puntos si Japeth Aguilar.
Gawas sa nagdilaab nga opensa, grabe sab ang depensa sa Team Pilipinas nga maoy naghatag og labad sa tulo sa Qatar sa kinatibuk-ang duwa. “Andray just created a lot of
opportunities for us on offense and in defense,” matod ni Team Pilipinas coach Yeng Guiao.
“He changed the whole team. The guys just felt good playing with him.”
Sa kinatibuk-an, ang Team Pilipinas nakapasulod og 15 ka three-point shots nga maoy labing daghan niining nahimo sa kinatibuk-ang qualifiers.
Taliwala sa kadaugan, ang Team Pilipinas nagpabilin sa ikaupat nga luna sa Group F dala ang 6-5 nga rekord sunod sa Japan ug Iran nga pulos adunay 7-4 nga rekord ug Australia nga adunay 10-1 nga baraha.
Ang mopatigbabaw nga tulo sa Group E ug Group F lakip na ang 4th placer nga adunay mas taas og standing mao ang maka-qualify sa 2019 FIBA World Cup.
Karong Dominggo sa gabii, sagubangon sa Team Pilipinas ang katapusan niining tahas sa qualifiers pinaagi sa pag-asdang sa balwarte sa Kazahkstan.