WBO mimando og purse bid sa Nietes-Palicte 2

Nimando og purse bid ang World Boxing Organization (WBO) alang sa world super flyweight title fight sa Pinoyng mga boksidor nga sila si ALA fighter Donnie “Ahas” Nietes ug Aston Palicte karong Pebrero 28 sa WBO headquarters sa San Juan, Puerto Rico.

Sa taho sa www.philboxing. com, nagpadala na og suwat si WBO Championship Committee chairman Luis Batista-Salas sa duha ka mga kampo kabahin niini.

Gimanduan ni Batista-Salas ang promoter ni Nietes nga si ALA presideng Michael Aldeguer ug promoter ni Palicte nga si Guy Taylor sa Roy Jones Promotions nga mosumiter og minimum bid nga $100,000.

Ang ubang promoters sa kalibutan mahimo sab moapil alang sa bidding.

Nimando og purse bid ang WBO human wala nagkasinabot ang ALA Promotions ug Roy Jones Jr Promotions sa paghanay sa panag-enkuwentro og balik nila ni Nietes ug Palicte.

Sa rematch, depensaan ni Nietes ang WBO super flyweight title.

Sa premiro nilang away niadtong Septiyembre, nag-ilog na sila Nietes ug Palicte ning maong bakus nga bakante pa niadtong higayuna. Natabla ang ilang away.

Niadtong Disyemnbvre 31, nakuha ni Nietes kining maong bakus pinaagi sa split decision nga kadaugan batok kang Japanese superstar Kazuto Ioka.

Dili pa lang dugay, si Palicte midaog sa usa ka world title eliminator bout hinungdan nga naangkon niya ang katungod sa pag-challenge kang Nietes.

Si Aldeguer nipabuhagay nang daan nga dili unta sila interesado nga duha ka mga Pinoy ang mag-ilog sa usa ka world title apan ning maong kalambuan, wala na siya'y mahimo.