DUTERTE MIBALOS SA TABANG NI GWEN
Giisip nga balos ni Presidente Rodrigo Duterte ang pagtuboy sa kandidatura ni Kongresista Gwendolyn Garcia sa tersero distrito sa Sugbo, kinsa nibalik sa pagpapili isip gobernador sa lalawigan karong Mayo 13, tungod sa dakong natabang sa naulahi sa makabuhong nga kadaugan ni Duterte sa Sugbo sa miaging presidential election niadtong 2016.
Si Duterte mismo nipadayag niini atubangan sa liboan ka mga Sugbuanon atol sa rally sa PDP-Laban niadtong Dominggo sa gabii, Pebrero 24.
Alang ni Garcia, dako kini og impact sa iyang kandidatura ilabi na kay hilabihan ka popular ang presidente dinhi sa Sugbo.
Nibalik-lantaw ang presidente sa suporta nga gihatag sa pamilya ug partido ni Garcia ngadto kaniya atol sa iyang gihulagway nga “critical hours” sa iyang kandidatura pagka-presidente sa 2016.
Dako og pasalamat si Garcia nga nahinumdom ang presidente ug karon gibaslan siya og endorso.
Si Garcia, anaa pa sa iyang ikaduhang termino pagka-kongresista sa 3rd district, magpapili na usab pagka gobernador sa Sugbo.
“Alang kanako, dako gyud kaayo to sangatanan og impact. Nasayod kita unsa kapopular ang atong presidente sa Pilipinas unya labi na gyud diri sa Cebu. Kita ang naghatag kang Presidente Digong og pinakadakong mayoriya sa tanang dapit. Way laing nakahatag og 1.4 million votes nga mayoriya,” nagkanayon ni Garcia.
“Mao kadto nga ang suporta (niya kanako), iya gyud gipaklaro og maayo gabii (Pebrero 24). Kahibalo ko nga motuhop gyud to sa mga Sugbuanon nga nagpangga sa atong presidente,” dugang ni Garcia Gihulagway ni Garcia nga ang endorsement ni President Duterte kaniya karon usa ka “turning point” sa iyang kandidatura sama nga “turning point” usab kini sa kandidatura ni Duterte niadtong 2016 kay gikan sa number 4 sa survey, nahimo siyang number 1, duha ka semana human sa pagdeklarar ug suporta sa mga Garcia.
Ang iyang kaatbang nga si Bise Gob. Agnes Magpale, kinsa nagpili nga gobernador, wala mahulga niini.
Gihulagway niya ang endorsement ni Duterte kang Garcia nga usa ka “political exercise.”
Kung si Duterte niisa sa kamot ni Garcia, gitumbok ni Magpale nga ang presidential daughter nga si Mayor Sara Duterte-Carpio, mao sab ang niisa sa iyang kamot nga kaalyado sa ilang Bakud Party.
Bisan sa pagsuporta sa presidente sa iyang kaatbang, gipaniguro sa bise gobernador nga padayon niyang suportahan ang kampaniya sa administrasyon batok sa korupsiyon ug ilegal nga drugas. /