FRASCO DI MOKOLEKTA OG ABANG SA MERKADO

Tungod sa pagsaka sa presyo sa mga produkto sa petrulyo ug nag-unang mga palaliton, dili una mangolekta og abangan sud sa usa ka tuig ang kagamhanan sa lungsod sa Liloan sa mga nangabang og stalls sa bagong merkado publiko nga gidumala niini.

Ubos sa Ordinance No. 2019-02, ang moratorium sa abangan sa mga stall sa Panphil B. Frasco Public Market (PBFPM) nga nahimutang sa Barangay Jubay, magsugod gikan sa Enero hangtod sa Disyembre ning tuiga.

Tumong sa ordinansa nga mapagaan ang kalisod nga gibati sa mga manindahay ug mangabangay sa mga stall sa PBFPM sa nagsaka nga presyo sa mga nag-unang palaliton karon.

Ang mga vendor ug stallholder sa PBFPM ang nihangyo ni Liloan Mayor Esperanza Christina Frasco sa usa ka tuig nga moratorium sa mga stall rental ug kini giduso sa mayor ngadto sa Sangguniang Bayan alang sa pagtugot.

“Granting the said moratorium of the stall rental at this time when prices of basic commodities are rising and inflation an all-time possibility is the least that the Local Government of Liloan can do to somewhat ease the hardships of the Liloanons Market Vendors and Stallholders,” nagkanayon ang ordinansa.

Ang ordinansa nga gipangamahan ni Konsehal Leo Pilapil napalabang sa konseho sa lungsod niadtong Enero 23, 2019.

Kini giaprobahan ug gipirmahan ni Liloan Mayor Esperanza Christina Frasco niadtong Enero 30, 2019.

Ang ordinansa giduso ngadto sa Sangguniang Panlalawigan (SP) sa Sugbo ug gi-refer ngadto sa committee on ways and means a gipangulohan ni Provincial Board Member Horacio Paul Franco, alang sa review ug pinal nga pagpasar sa ordinansa.