Rama gibayaw, nasurprisa nga gituboy ni Digong
Sa wala damha, giindurso ug giisa ni Presidente Rodrigo Duterte ang kamot ni kanhi mayor Michael Rama nga maoy runningmate ni Bise Mayor Edgardo Labella sa eleksiyon sa Mayo 13. Si Labella maoy standard bearer sa PDP-Laban sa pagka-mayor ug si Rama ang iyang bise mayor diin lakip sa giisa ni Duterte ang kamot sa actor nga si Richard Yap kinsa nagpapili pagka-kongresista sa north district.
Wala say kabutangan sa kalipay ni Labella sanglit ang gibuhat ni Duterte makaayo sa ilang partido.
“Nalipay ko sa pagsalig ni Presidente Rodrigo Duterte kanako ug sa mga kauban sa sa Barug-PDP-Laban. Sa tumang pagpaubos nagpasalamat kami sa pangulo ug amo gyud paningkamotan nga ang iyang pagsalig dili makawang labi na sa pakigbugno sa kurapsyon, illegal drugs ug krimen,” matod sa kandidato pagka-mayor.
Si Niña Mabatid, barangay kapitan sa Mabolo kinsa nagpapili pagka-konsehal sa north district, niingon nga kini magpapas sa branding nga sila grupo sa manuyopay nga maoy gibato sa ilang kontra.
“This should stop (Mayor Tomas Osmeña) from calling us Team Suyop. The black propaganda is over. Cebu City needs a new administration. A mayor who is loving, forgiving and embracing regardless of political colors,” pulong ni Mabatid.
Si Konsehal Raymond Garcia niingon nga ang pag-endurso ni Duterte makadugang sa pagsalig sa katawhan.
“I am overwhelmed with happiness and thankful to the President for endorsing Mayor Labella and Vice Mayor Rama,” matod ni Garcia.
Si Konsehal Renato Osmeña Jr. niingon nga ang iyang “personal nga pag-endorso kanamo gahapon nagpakita sa iyang pagsalig.”
Si Konsehal Joel Garganera nihulagway, “On him being accused as a drug protector, Mike Rama has a clear and innocent conscience and that is why he fears nothing.”
Si Mayor Osmeña kanunay nga motawag sa grupo ni Labella nga “Team Suyop” gumikan kay niadtong 2016, si Rama giapil sa lista ni Duterte nga gisulti sa publiko nga drug protector sa Sugbo. Sa pag-endurso sa pangulo, ilang gihulagway nga nasutang inosente si Rama. / PAC