Pag-legalize sa habalhabal giawhag nga mapadali

Cebu Provincial Board Marjority Floor Leader Jude Thaddeus Sybico mihangyo sa Senado nga mopahigayon og special sessions aron mapasar ang balaodnon nga mag-legalize sa operasyon sa habalhabal dinhi sa nasod.

Matod sa opisyal nga bisan kon nag-recess na ang Kongreso ug wala nay oras aron makompleto ang enactment sa balaod aduna pay siyam ka sessions nga nahabilin ang Senado gikan sa Mayo 20 hangtod sa Hunyo 7.

Si Sybico mipasabot mahimo pa nga ma-convene ang House-Senate Bicameral Conference Committee aron ma-reconcile ug ma-consolidate ang mga balaudnon nga dunay susama nga katuyoan, alang sa ratipikasyon sa duha ka mga balay balauranan hangtod maaprobahan sa presidente.

Ang bokal namahayag nga mas maayo nga makita sa mga senador kon unsa ka mahinungdanon ang habalhabal sa hilit ug sudlunon nga mga lugar.

Iyang gihimo nga sanglitanan ang bukirang mga barangay ubos sa iyang distrito, 5th District diin daghang mga dapit ang sudlunon ug wala nay mobiyahe nga mga public utility jeepney, bus ug taxi.

“This year gyud ha, the Senate, they can assemble man right away, pila ra man kabuok and seguro if needed mga special sessions kon ila lang ni tagaan og importansiya para nako. The Congress has done their part and ako I really laud Congress kay kahibawo gyud sila, daghan sila og representatives sa district. So, kahibaw gyud sila unsay kinahanglan sa tawo sa ilang distrito bitaw,” pasabot ni Sybico.

Ang resolusyon ni Sybico giaprobahan sa PB atol sa session niadtong Lunes, Pebrero 18.

Way nakitang pamulitika ang bokal sa pagkapasar sa ikatulo ug katapusang pagbasa sa Ubos Balay Balauranan sa House Bill 8959 nga magtugot ug mag-regulate sa paggamit sa mga motorsiklo isip public utility vehicles.