Pulis nagpabuto og armas, gipriso

Na-unay og balhug sa bilanggoan ang pulis human nagpabuto sa iyang armas gumikan sa kahubog niadtong Dominggo, Pebrero 24 sa Brgy.San Rafael, lungsod sa Barili, Sugbo

Si PO2 Merlou Dapar, taga Barangay Japitan, Barili, Sugbo nga sakop sa Drug Enforcement Team sa Barili Police Station ang gitanggong sa ilang detention cell samtang gikatakda nga pasakaan kasong alarm and scandal karong adlawa ug kalapasan sa Comelec gun ban.

Si PO3 Jeffrey Alpas,desk officer sa Barili Police Station nibutyag sa Superbalita Cebu nga gialarma si PO2 Dapar kinsa hubog ug nagpabuto sa iyang armas.

Matod ni Alpas nga nagpa-blotter niadtong Domingo sa 9:00 sa gabii si Brgy.Konsehal AKim Montemayor, 46, Brgy.San Rafael, uban kang Angelita Montemayor 43, ug Barangay tanod nga si Daniel Aguilar, 48.

Gireklamo nila si Dapar nga nagpabuto ug nanghulga kanila.

“Ikaw Do, Ikaw Day, bantay lang mo nako,” kutlo nila sa gisulti ni Dapar sa wa pa nisakay ang pulis sa iyang motorsiklo aron mopauli.

Sa pag-alarma sa kapulisan wala na igkita ang pulis sa ilang balay, apan paglabay sa pipila ka oras bulontaryong mitahan si Dapar.

Gi-surrender sab niya ang service firearm nga Glock 17 uban sa 13 ka buhing bala.

Sa ilang imbestigasyon, day off si PO2 Dapar niadtong higayoan ug nianang pagka-hapon nagduwa pa kini og volleyball sa Barangay San Rafael dayon nag-inom hangtud sa pagka-gabii uban sa mga higala niya.

Gihulagway ni PO3 Alpas nga buotan si Dapar, apan tungod sa ka hubog wa na makakontrol sa kaugalingon.