ANG BURGER UG CHICKEN WINGS SA KALYE 648
Gawas sa sikat nga siomai sa Barangay Tisa, Cebu City, usa usab ka kan-anan ang gibalikbalikan karon sa katong hilig mag-food trip.
Ang Kalye 648 sa 648 F. Pacaña St., Barangay Tisa midalit og lami ug maabot nga presyo sa mga pagkaon.
Gikan sa burgers, fries, sizzlings, shakes, ngadto sa chicken wings, angay ni matilawan sa grupo o pamilya.
Ginganlan kini og Kalye 648 subay na usab sa lokasyon sa maong kan-anan. Ang building niini usa ka karaang balay nga giayo ug gihimong kan- anan.
Ang managsuon nga tag-iya - sila si Jennifer May Dacera ug Monica Ylagan nagkasabot nga magtukod og negosyo nga kan-anan.
Sila si Monica ug iyahang uyab nga si Christopher Mangubat, kinsa parehong chef, mao ang mangunay og luto sa mga pagkaon nga anaa sa menu.
Nibukas sila sa publiko niadtong Oktubre 18, 2018 ug abli sila matag Martes hangtod Dominggo, 4:30 p.m.-11:30 p.m.
Ang popular sa ilahang menu mao ang Kalye Burger nga tag - P120.
Lima ka klase ang Kalye Burger, ug si Christopher mismo ang mohimo sa patty.
Best seller usab ang Kalye Ribs nga tag-P140. Aduna pud chicken wings nga nagkadaiya ang flavor. Ang spicy chicken wings ang paborito sa kadaghanan.
Personal usab nga recipe sa ilahang mommy ang Sizzling Sisig ni Mommy.
Sagad sa ilahang rice meals tag - P120.
Daghang tinun-an ang mangaon tungod kay maabot ra nila ang presyo sa mga pagkaon.
Ug dili ka angay mobiya sa Kalye 648 kon wala nimo matilawi ang Deep Fried Oreos nga malamian.
Promise! Bisitaa ang Kalye 648 sa Barangay Tisa ug ayaw pauwahi sa trending nga kan-anan. /