Comelec control?

Grabe. Ang sitwasyon sa kalinaw ug kahapsay sa lungsod sa San Fernando, Cebu sa umaabot nga piliay sa Mayo 13, 2019 usa ka dakong suliran sa Commission on Elections (Comelec) ug sa atong kapulisan. Kini human gipusil-patay si Konsehal Alfonso Donaire IV didto sa Ramon Magsaysay, Zamboanga del Sur, ang dapit nga iyang gitagoan tungod sa hulga sa iyang kinabuhi.

Sa interbyu, si Acting Provincial Election Supervisor Jerome Brillantes miingon nga iyang irekomendar nga padalhan og dugang pulis ug sundalo sa San Fernando sa naghingabot nga piliay tungod sa bag-o lang nga pagpusil-patay kang Konsehal Donaire didto sa Zamboanga del Sur. Apan di morekomendar si Brillantes nga ibutang kini sa Comelec control tungod kay ang mga panghitabo di pa igo nga rason.

Matod pa sa taho, si Donaire ang ikaupat nga opisyal sa San Fernando nga gipusil-patay. Ang nag-una mao sila si Kon. Edwin Villaver, Kon. Reneboy Dacalos ug Magsico Barangay Kapitan Johnny Ariesgado. Silang upat gidudahan nga dunay kalambigitan sa negosyo sa ilegal nga drugas.

Sa Enero 22, si San Fernando Mayor Lakambini Reluya, iyang bana ug mga kauban gi-ambush ang ilang sakyanan dapit sa Talisay City samtang nagpadung sila sa dakbayan sa Sugbo. Patay ang iyang bana nga si Ricardo, ang drayber ug lain opisyal sa lungsod. Hangtod karon wa pay klarong suspek. Si Ruben Feliciano, nga kaatbang ni Mayor Reluya sa Mayo 13 nga piniliay, mihimakak nga duna siyay kalabutan sa hitabo.

Mga magtutudlo mibalibad nga moserbisyo isip Board of Elections Inspectors (BEI) tungod sa hulga sa kalinaw sa adlaw sa piliay sa San Fernando. Apan bag-ohay lang tungod sa pasalig sa Comelec ug sa pulis nga hatagan sila og igo nga seguridad misugot nga manrabaho sa adlaw sa piliay.

Way lain makita nga hinungdan sa hulga sa kalinaw ug kahapsay sa San Fernando kon dili ang ilegal nga drugas tungod kay diha nakabasi ang mikompisal nga drug lord nga si Franz Sabalones, nga ang iyang igsuon nga si Fralz maoy bise mayor apan wa na magpakita sukad sa pagsugod sa administrasyon ni Presidente Duterte.

Si Mayor Reluya ug ang iyang bana wa hinuon mahilambigit sa ilegal nga drugas apan nalakip sa giingon nga “hit list” nga gituhoan naggikan sa kampo ni Feliciano kinsa mihimakak nga “fake” ang Facebook

account diin migawas ang maong hit list. Apan hangtod karon duna pay nagduda nga may kalambigitan siya sa hitabo.

Atong ipanghinaut nga way dautan nga mahitabo ig-abot sa Mayo 13, 2019, adlaw sa piliay, di lang sa San Fernando apan sa tanan nga dapit aron atong ikapakita di lang dinhi sa ato apan ngadto usab sa uban nasud nga husto na ta sa pangidaron sa pulitika.

PAL. Maayong pag-abot sa mga nagkalain-lain nga golf

teams gikan dinhi sa atong nasud ug sa gawas nga mosalmot sa ika-72 nga PAL Interclub golf tournament nga anhi ipahigayon sa Alta Vista Golf and Country Club ug sa Club Filipino de Cebu nga magsugod sa Pebrero 27.