Nagsagol ang lokal, nasyonal?

Ang umaabot piliay sa Mayo 13, 2019 daw kombinasyon sa nasyonal ug lokal nga piliay taliwala sa grabi nga politikanhong polarisasyon karon.

Atong nakita nga nangulo sa pagpangampanya sa mga kandidato sa administrasyon sa dakong rali sa PDP-Laban sa miaging Dominggo mao mismo si Presidente Rodrigo Duterte.

Karong umaabot nga Marso, atong gilantaw nga ipahigayon sab ang laing higante nga rali sa Hugpong ng Pagbabago uban kang Davao City Mayor Sara Duterte.

Gawas nga kining HNP nagmugna og koalisyon sa mga pundok nga pro-Duterte apan dili PDP-Laban, gihisgutan na karon ang posibilidad nga modagan si Inday Sara alang sa pagka presidente karong umaabot 2022.

Kining kampanya karon sa HNP naghatag og nasugnong stage alang kang Inday Sara aron mahimo siyang potential nga kandidato.

Hinuon, sa pagkakaron, di man angayan siyang moangkon sa plano. Sayop ang moanunsyo og sayo sama sa gibuhat ni Bise Presidente Jojo Binay alang sa piliay sa 2016.

Nakahinumdom pa ko sa kampanya ni Binay nga maoy nag-una unta sa mga survey alang sa pagka presidente. Siya dayon ang nahimong target sa mga demolition job.

Dayon, kasagaran tua ra si Inday Sara sa Syudad sa Davao ug karon lang siya nisuroy sa tibuok nasud aron mangampanya alang sa iyang mga kandidato alang sa pagka senador.

Apan si Inday Sara, bisan pa man og tua ra siya sa Davao, nakamugna og dakong koalisyon nga nakatangtang kang kanhi House Speaker Bebot Alvarez.

Apil sab sa maong koalisyon ang mga dagkong ngalan sa lain-laing dapit sa Pilipinas.

Sugbo?

Dakong pangutana karon kon si kinsa man ang iyang mga kaalyado sa lalawigan ug Syudad sa Sugbo. Atong nasayran nga sa pagkakaron, giisa ni Presidente Duterte ang mga kamot nilang Kong. Gwen Garcia, Bise Mayor Ed Labella, ug Mike Rama.

Sa miaging mga buwan, giendorso ni Inday Sara silang Gwen ug Bise Gob. Agnes Magpale lakip na kang Mandaue City Mayor Luigi Quisumbing.

Makalibog kining lakang ni Inday Sara kay magkaatbang man silang Gwen ug Magpale. Buot ba niyang ipasabot nga sona libre ang lalawigan sa Sugbo?

Apan lahi ang hulagway sa Syudad sa Mandaue kay PDP-Laban si Kong. Jonas Cortes. Gani, didto man siya sa kalihokan sa miaging adlaw uban ni Presidente Duterte.

Si Luigi lang ang giisa nga kamot ni Inday Sara bisan pa og welcome man gihapon ang mayor sa Mandaue sa grupo sa presidente.

Alang kanako, kulbahinam nga atangan mao ang kaalyado unya ni Inday Sara sa Syudad sa Sugbo. Mahibaw-an nato kini sa mosunod nga mga semana.