Taiheiyo, MGB-7 nananom og kahoy
Nangadto ang mga kawani ug kahigalaan sa Mines and Geosciences Bureau (MGB) sa Central Visayas sa Taiheiyo Cement Philippines, Inc. (TCPI) sa San Fernando, Cebu harun mananom og 200 ka mga kahoy sa buffer zone sa planta sa maong kompanya. Gitak-opan sa maong ahensya nga sakop sa Department of Environment and Natural Resources (DENR) ang kasaulogan sa maayong kalikopan pinaagi sa paghatag ug unod sa pagtipig ug pagdugang sa biodiversity pinaagi sa pagpananom og bag-ong mga kahoy.
Nakatanom ang 50 nga delegasyon og 180 ka mga nangka ug 20 ka guyabano ug custard apple sa maong buffer zone luyo sa habagatang bahin sa pabrika sa semento.
Gipatan-aw sab sa Solid Earth Development Corp. (SEDC) ang delegasyon sa minahan niini sa anapog sa bukirang bahin luyo sa planta sa TCPI, ug gipa-ambit niini kung giunsa nila ang operayson nga uban ang pangunang pagtagad sa kalikopan.
Tigpadagan sab ang SEDC og mga minahan sa ibabao pa’ng bahin sa lungsod alang sa kulon. Kasagaran sa mga kanhi naminahan nahimo na’ng kalasangan human sa ilang rehabilitasyon, miambit si Joel Sombelon, safety and environment officer niini, ngadto sa mga bisita.
“Panahon karon nga makigalayon kita og kompanyang tigtamod sa mga lagda sa pagpasabot sa publiko kabahin sa Responsibleng pag-Mina, og unsa kini alang sa mga komunidad ug rehiyonal nga ekonomiya,” nipadayag si MGB-7
regional director Loreto B. Alburo sa hangyo niya nga mobisita sa TCPI ug SEDC.
Komitido
Gihatagan sa duruha ka mga kompanya ang delegasyon, lakip na ang mga kawani sa ubang ahensya sa nasudnong kagamhanan, og pasundayag ug panaghisgut-hisgot kabahin sa responsibleng pag-mina ug panginabuhian. Kanunay nga na-abi-abi sa TCPI ug SEDC ang MGB-7 sa mga kalihokan niini, una pagka-2010, dayon sa 2014, sa mga kasaulogan alang sa kalikopan.
Gipa-ambit ni Dennis Tenefrancia, pangulo sa SEDC, nga migahin ang kompanya og igong gahin alang sa mga kalihukan sa pagpanalipod sa kalikopan, pag-ugmad sa komunidad ug sa lokal nga ekonomiya.
“Usa ang SEDC sa mga most compliant mining company nga nagtamod sa RA 7942, kon Philippine Mining Act of 1995,” miingon si Tenefrancia, uban sa paghisgot sa San Agustin Eco-Pilgrimage Park nga namugna sa kompanya ug gibuksan sa Magsico tuig na karon.
“Pagpaninguha, mga sakripisyo, pasalig sa pagkamaayo, ug paglahutay nga mabaton ang among tumong uban sa malungtarong pakig-alayon alang sa kalikopan ug panginabuhian mao’y kanunay natong gitampo sa komunidad,” mipahayag si Tenefrancia.
Gihimug-atan ni Armando Malicse, hepe sa MGB-7, nga kinahanglang ipatuman ang mga katuyuan sa pamatigayon ug ekonomiya nga nahi-uyon sa kinaiyahan ug katilingban. Responsibilidad sa SEDC ngadto sa katilingban nga amumahon ang atong minahan, siya mipunting.