Lebron James mireklamo na sa iyang mga kauban

Sa iyang pagsulod sa Los Angeles Lakers, nasayod si LeBron James nga daghan pang angayang makat-unan ang iyang batan-ong mga kauban ug kinahanglan niyang patas-an ang iyang pasensya.

Apan human sa kapildihan sa Lakers batok sa nagsalimoang nga New Orleans Pelicans, 128-115, niadtong Dominggo sa National Basketball Association (NBA), mireklamo na ang four-time MVP sa iyang mga kauban.

Gikan niadtong 2012-13 season, ang multi-titled Lakers wala na nakasulod sa playoffs ug gilauman nga paghiabot ni James sa ilang balwarte, hayan mausab na ang dagan sa ilang kampanya.

Apan gumikan sa tulo ka mga pilde sa Lakers sa miagi nilang upat ka mga duwa, hayan nagkatiglom na ang ilang poruhan nga makabalik og sulod sa playoffs.

Ang Lakers kasamtangang nakapuwesto sa ika-10 sa Western Conference dala ang 29-30 nga rekord.

Naglungotlungot na’g sugod si James, kinsa nakasulod sa finals sa miaging walo ka sunodsunod nga season ubos sa mga kampo sa Miami Heat ug Cleveland Cavaliers.

“How many know what’s at stake if you’ve never been there?” batbat ni James human sa kapildihan sa Lakers batok sa Pelicans nga ningkombati nga wala ang ilang sinaligang sentro nga si Anthony Davis. “I’m playing devil’s advocate, you know? It’s kind of a fine line when you talk about that, because when you’ve never been there or know what it takes to actually shoot for something like that, sometimes you’re afraid to get uncomfortable.”

Ang beteranong pointguard sa Lakers nga si Rajon Rondo nga ning puntoha, kinahanglang magtinabangay ang matag usa kanila ug ipagawas ang tanan nilang makaya sa matag duwa nga ilang pagasagubangon.