GILAS SULOD SA WORLD CUP
Nakabaton pagbalik og luna sa prestihiyusong FIBA Basketball World Cup ang Team Pilipinas human sa dakong kadaugan niini batok sa host Kazakhstan, 93 75, niadtong Dominggo sa gabii atol sa katapusang adlaw sa Asian quali ers sa Republican Velodrome Saryarka sa Astana, Kazakhstan.
Sa usa ka salikwaot nga panghitabo, ang pagsulod og balik sa Team Pilipinas sa matag upat ka mga tuig nga kompetisyon nahimong posible gumikan sa nahatag nga tabang sa higpit niining karibal nga mao ang South Korea.
Sa ilang pag-asdang sa Kazakhstan, ang Team Pilipinas nagpas-an og malisod nga misyon alang sa ilang tinguhang makabalik sa World Cup nga
ipahigayon sugod karong Agusto 31 sa China.
Gawas nga kinahanglan nilang lupigon ang Kazakhstan, ang Team Pilipinas manghinaot nga mapilde bisa’g asa sa Japan, Jordan ug Lebanon sa tagsatagsa sab niini ka katapusang tahas nga dungan nga gipahigayon sa sangka sa Team Pilipinas ug Kazahkstan.
Nabutang sa delikado ang sitwasyon sa Team Pilipinas dihang gipangmakmak sa Japan ang Qatar, 96 48, unya gipukan sa Jordan ang New Zealand, 86 80.
Hinuon, nabuhian og paglaom ang Team Pilipinas dihang gipangbuntog sa South Korea ang Lebanon, 84 72, ug ning mga gutloa, wala pa nahuman ang duwa sa Team Pilipinas ug Kazakhstan.
Tuod man milam- pos ang Team Pilipinas sa pagdispatsar sa Kazakhstan aron angkunon ang ikawalo ug katapusang luna sa World Cup alang sa mga nasod gikan sa Asya. Ang Team Pilipinas makiguban sa Australia, Iran, Japan, Jordan, New Zealand, South Korea ug host China nga modala sa bandera sa Asya alang sa World Cup.
Ang naturalized player sa Team Pilipinas nga si Andray Blatche nagpakita og grabeng determinasyon ug gipangulohan niya ang kadaugan pinaagi sa iyang 41 puntos ug 14 rebounds.
Si Blatche maoy nidugkat sa nagdilaab nga opensa sa Team Pilipinas pinaagi sa pagmugna og 17 puntos human sa 1st quarter diin naglabaw ang mga Pinoy, 22 21.
Human niini, hinayhinay nang ningsuporta sa opensa ang lokal nga mga magduduwa sa Team Pilipinas partikyular sila si Jayson Castro, JuneMar Fajardo, Marcio Lassiter ug Paul Lee.
Naahat si Team Pilipinas coach Yeng Guiao nga palingkuron kini og taas-taas nga oras sa 2nd half gumikan kay na-foul trouble kini.
Si Fajardo maoy gitahasan ni Guiao sa pagtapak sa haw-ang nga nahulma sa pagpadaplin ni Blatche ug tuod man, wala gipakyas sa Sugbuanong higante ang usa sa labing resptadong coach sa Pilipinas.
Gawas sa iyang depensa, ang produkto sa University of Cebu (UC) Webmasters ug lumad nga taga lungsod sa Pinamungajan, Cebu niamot sab og siyam ka mga puntos. Puntos matag usa: Philippines (93) – Blatche 41, Castro 15, Fajardo 9, Lassiter 8, Lee 8, Rosario 4, Aguilar 4, Pogoy 2, Barroca 2, Ravena 0, Erram 0, Norwood 0 Kazakhstan (75) – Clemmons 27, Gavrilov 12, Yergali 11, Zhigulin 8, Murzagaliyev 8, Maidekin 4, Bazhin 3, Bykov 2. Quarters: 22 21; 45 40; 71 60; 93 75.