Paryente, pwede ba?

Dear Papa Joe,

Ako diay si Oman, 23 years old, taga Ormoc.

Ang akong suliran kabahin sa akong lovelife. Naa koy paryente nga babaye ug distansya na ang among pagka mag-agaw. Pero suod among mga ginikanan ug nagkasuod pud mi. Sa wa damha, lahi ang niturok namong duha. Maora bag gusto lang namo ang lawasnong kalipay ug nagkauyon mi. Pero niabot ang resulta nga nasipyat gyud ug karon mabdos ang babaye.

Gusto sa iyang mga parents nga kaslon mi pero akong parents dili kay paryente ra kuno. Bisan mosugot pa akong mga ginikanan, di sad ko kay di pa ko andam kay wa pa koy trabaho. Matod pa sa babaye nga kon di nako panubagon iyang pagmabdos, may dautan kunong mahitabo nila. Mao nga magpatambag ko.

OMAN Oman,

Tinuyoan man na ninyo, inyo gyud nang barugan. Kon ang pagkaparyente lang ug lagyo na mo, pwede gyud mo makasal kay kato lang ganing anak sa babayeng presidente, nakasal man gani bisan duol ang ilang pagkamag-agaw.

Ang tinud-anay gyud, di ka andam kay tanan bunga ra sa lawasnong kalipay. Pero nakapamabdos ka mao nga be responsible. Sa wa pa na ninyo buhata, nasayod na mo unsay epekto ana pero gipadayon ninyo. Tuod kuyaw tinud-on sa babaye iyang bahad. Trabaho? Simple, pangita kay amahan ka na. Daghang salamat.

PAPA JOE

( sa inyong tampo ipadala sa papajoesuperb@gmail. com)