QR Teams gi-umol sa DA7

Ang Department of Agriculture (DA)7 mo-umol og quick reaction teams nga maoy tahasan sa pagsusi sa kahimtang niadtong lugar nga grabeng maapektuhan sa El Niño.

Gipahibawo ni DA 7 Regional Director Atty. Salvador Diputado ka-abag sa quick reaction teams ang mga Municipal Agriculture Officers (MAOs) aron usab sa pag-monitor kon aduna’y mga taho sa pagdagsa sa peste sa mga pananom ilang tagsa-tagsa ka mga dapit.

Matod ni Diputado nga wala pa hinuon sila makadawat og taho nga anaa na sa kritikal nga level ang pagkatap sa mga peste nga makamugna og kadaot sa mga pananom.

“So far, wala pa ta makadungog dinhi sa region nga alarming or critical na ang level. Naa na’y mga indications pero every now and then duna man sab taligsik,” matod ni Diputado.

Sa Central Visayas, ang Bohol pa lang ang aduna’y reported nga pagpangliki sa yuta sa mga ka-umahan.

Apan wa pa kini makonsiderar nga angayan kabalak-an.

Gipasabot ni Diputado nga ang buwan sa Marso mao ang sinugdanan sa summer months.

“Kung mo-us os nana ang mga tubig sa dams, dinha na magmeet ang mga QR teams to discuss the matter,” dugang sa direktor.

Nipahibawo usab si Diputado nga adunay nakaandam na nga pundo alang sa mga mo-request og cloud seeding operations sa mga lugar nga nanginahanglan niini.

Apan matod niini nga adunay limitasyon sanglit mag-agad kini sa panganod ug hangin.

Samtang, nipasalig usab si DA Secretary Emmanuel Pinol nga aduna’y pondo nga nakaandam aron sa pag-insure sa mga pananom sa mga mag-uuma ubos sa Philippine Crop Insurance Corp. (PCIC).