Taga Bohol dakpan sa checkpoint

Palawman sa pagsusi sa mga kapulisan sa Centro Police Station sa dakbayan sa Mandaue ang kalabot sa usa ka lalaki nga nakuhaan og duha ka armas ug tulo ka medium pack sa gidudahang shabu atol sa checkpoint nga gipahigayon sa Commission on Election (Comelec).

Usa sa ilang lantawon kon dili ba lakip ang dinakpan nga si Erwin Ilano, 39-anyos, nga taga Maribojoc, Bohol, sa mga sunod-sunod nga mga pagpamusil-patay sa syudad nga naglambigit sa mga motor-riding-suspect.

Ipaubos sa ballistic examination ang nasakmit gikan kaniya nga .380 caliber ug .38 kalibre nga pulos puno sa mga bala, kon motukma ba sa mga gigamit sa pipila ka mga kaso sa mga pagpamusil sa nahisgutang dakbayan.

Luwan sa taxi si Ilano sa dihang nabantayan sa mga pulis atol sa checkpoint sa may dalan Zuelig sa barangay Centro human kalit gitaguan ang bag niini nga maoy gisudlan sa duha ka armas.

Nakuhaan usab kini og tulo ka medium pack sa gidudahan nga shabu, nga mobalor og P25,000. Giingon nga gikan kini sa barangay Pasil sa dakbayan sa Sugbo ug padulong sa syudad sa Lapu-lapu.

“Pag-flashlight nato sa sulod, mura siya og nakalitan, gikalit og tago ang iyang bag, mao ato siya gihangyo nga pagawas sa taxi, ug gipaabli ang bag, didto nakita nato ang duha ka armas, asta ang tulo ka medium pack sa shabu. Ato na gi-background, kay lumad taga Bohol man daw ni," padayag ni Police Major Aldrin Villacampa, hepe sa Centro Police Station.

"I-check sad nato if naa siyay involvement ba sa series of shooting incidents sa syudad. Kon motugma sa ballistic examination ang iyang mga armas sa uban nga unsolved shooting incidents, daku gyud posibilidad nga absin apil ni sa gun-for-hire” dugang niya.

Gisulayan sa pagkuha sa iyang habig si Ilano, apan nagdumili kini sa pag-atubang sa mga sakop sa media.

Si Ilano ang lakip sa 12 ka mga nasikop atol sa gihimo nga Comelec checkpoint nga gilusad sa niaging semana.

Laing upat ang nasakmitan usab sa ilang motorsiklo sa dihang ang driver ug angkas nakuhaan og drugas ug drug paraphernalia.

Kasagaran kanila, matud ni Villacampa, gikan sa Pasil ug Carbon sa dakbayan sa Sugbo, ug paingon sa Lapulapu City ug lungsod sa Consolacion. Mobalor og P30 mil pesos ang balor sa shabu nga nasakmit. / FMD