Mi-survive tungod sa pagkaon og mga sauce sa taco
Usa ka lalakeng taga Oregon, USA nakapamatuod nga maayo diay ang di manglimpyo og maayo sa sakyanan.
Si Jeremy Taylor nisulti sa mga awtoridad nga siya ug ang iyang iro nabuhi sud sa lima ka adlaw nga natanggong sa iyang sakyanan tungod sa snow pinaagi sa pagkaon sa mga pinutos nga sauce sa taco.
Ang 36 anyos, kinsa tig-off road sa dapit, niingon nga nimaneho siya padung sa norte sa Sunriver uban sa iyang iro nga si Ally, dihang ang iyang SUV niungot sa snow sa Dominggo, Pebrero 24, matod sa Deschutes County Sheriff’s Office.
Natulog siyag usa ka gabii sa iyang sakyanan ug nisuway sa paglakaw pagkasunod adlaw aron mangayo og tabang, apan naglisod tungod sa kabaga sa snow.
“Jeremy stayed warm over the next four days by periodically starting his vehicle and used a few taco sauce packets he had as food,” matod sa sheriff ’s department sa Facebook.
Sa report sa Yahoo News, gituohang wa siyay dala nga phone niadtong higayuna.
Niadto lang miaging Biyernes sa hapon dihang nakit-an ang iyang sakyanan sa usa ka snowmobile rider ug nanawag sa 911.
Sila si Taylor ug ang iyang iro gihulagway nga gutom apan naa sa maayong kahimtang.
Sa iyang Facebook post niadtong Sabado, gihulagway ni Taylor ang iyang kaugalingon nga “swerte” ug nidugang nga: “Lets never do that again.”“Taco Bell Fire Sauce saves lives.”
Mga awtoridad ningtambag sa mga driver nga magdala og winter car survival kit nga maglakip sa pagkaon nga di madaut, tubig, habol ug naandan nga toolkit ug first aid kit.
Mga driver nga ma-trap sa snow gitambagan nga paandaron ang makina matag 10 minutos aron magpabilin ang kainit samtang magdaginot sa fuel.
Kon nalubong kini sa snow, seguraduhon nga wa masampungi ang tambutso sa snow aron di mosulod ang carbon monoxide. /