Balaang pasidaan
Giobserbar karong adlawa, Marso 6, ang Miyerkules sa Balis, usa ka importanteng tulumanon sa mga Ramano Katoliko ug ubang Kristiyanong sekta. Nagtimaan kini sa pag-abli sa simbahan sa panahon sa paghinuklog sa pag-ampo ug pag-antos pinaagi sa pagpuasa sa Semana Santa. Balaang pasidaan sa panaw sa kinabuhing Kristiyano.
Labaw sa tanan, nagpahinumdom kanato nga kita tawo lamang. Dunay utlanan ang matag kinabuhi sa ibabaw ning kalibotan. Nagpahinumdom nga mobalik ang atong pisikal nga lawas sa pagka abo apan, ang espirituhanong kinabuhi mopadayon sa sabakan sa Magbubuhat.
Ug ang tradisyon sa pagbadlis sa agtang og krus gikan sa abo, pagahimuon sud sa 46 ka adlaw sa dili pa ang Semana Santa, ang labing balaang hitabo sa kasaysayan sa simbahan ug pagtuman sa saad sa bag-ong testamento sa pagtuo - diin si Kristo gipahimugso aron pagtubos sa katawhan gikan sa sala nga panulundon, gipaantos, ug namatay nga gilansang sa krus.
Subay sa kasaysayan sa simbahan, ang pagbadlis og abo sa atong agtang gikan sa tradisyon sa karaang Jewish nga timaan sa pag-antos ug puasa. Nagpahinumdom nga kita tawo, ulipon usab sa pagkasala. Nagsimblo og pagnulsol tungod sa pagkasala, ang hinungdang malayo kita sa Diyos.
Ang naasoy nga pagtulun-an naghatag og giya nga dili kita mapalabi sa materyal nga bahandi, salapi, lakip sa pag-abuso sama sa druga ug uban pa. Dili kini madala sa kamatayon.
Samtang, gitudloan kita nga mag-andam kanunay sa espirituhanong kaputli. Wa kita masayod kanus-an bawion ang hinuwaman nga kinabuhi. Gawas sa pag-ampo, mosagop sa mga mithi nga puno sa gugma. Taliwala ning tanan, motunhay usab ang mahilawon nga katilingban o komunidad.
Mapasalamaton kita sa opurtunidad sa pagkabuhi ug higayon nga makaplano sa atong tul-id nga panaw balik sa sabakan sa Magbubuhat. Kon ikaw magtutuo, magpabadlis kita karon.