Miss you in a heartbeat
Usa ka hapon nga gikan ko sa eskuwelahan, nakahunong kog lakaw sa sidewalk kay nakita ko sila si Lemuel ug Carla nga nangaon sa Mang Inasal. Naklaro ko sila kay diha man sila manglingkod duol sa bungbong nga bildo. Dia diay sa Cebu si Carla? Hilom kong nakapangutana. Nagpaniid ko nilang duha. Malipayon sila. Duna pay mga higayon nga mohapak-hapak si Carla sa bukton ni Lemuel.
“Sus, love pa gihapon nila ang usag usa.”
Nakaingon ko sa hilom dayon kong biya sa akong nahimutangan. Wa ko makasabot sa akong kaugalingon niadtong tungora, morag gibati ko ang kasakit sa akong dughan, morag nagselos ko. Nahigugma na ba ko sa tinuoray kang Lemuel? Nakaingon na sab ko sa akong kaugalingon.
Apan nahunahuna ko nga di sab kami si Lemuel ang para sa usag usa. Apan di ba duna na may boyfriend si Carla didto sa Manila? Aw, nakigbuwag na tingali siya sa iyang trato kay nasuta niya nga si Lemuel gyud ang iyang gimahal, ug maong nia siya karon sa Cebu aron sultihan si Lemuel sa tanan niyang pagbati ani.
Angay ko nang kalimtan ang tuyo ni Lemuel sa pagpakigbalik nako. Gusto lang gyud diay ko niyang himuong panakip-butas sa mga kamingaw niya kang Carla. Ang nakita kong kamalipayon nilang duha karon maoy timaan nga nagminahalay gyud sila sa usag usa.
Wa dayon ko makatulog niadtong gabhiona. Naunsa ba ko, uy? Naglagot na nuon ko sa akong kaugalingon. Kanunay kong nahunahuna sila si Lemuel ug Carla. Na, nagselos gyud ko kang Carla, di ko kabakakan ang akong kaugalingon. Labaw na nga di ko kalimdan ang akong pagbati. Nahigugma na gyud ko sa tinuoray kang Lemuel.
Apan laing kapakyasan na sab sa akong true love ang nahitabo ron nako.
Pagka ugma kay Sunday man, pagkahuman kog pamahaw, miadto ko sa sementeryo nga gilubngan ni Rod. Giduaw ko siya. Gidagkotan ko siyag kandela ug mihalad ko niyag hilom nga pag-ampo alang sa iyang kapahuwayan nga dayon.
Hilom kong nangaliya sa Diyos nga pasayluon si Rod sa mga kasaypanan nga iyang nahimo samtang buhi pa siya. Unya mibiya na ko sa atubangan sa lubong ni Rod. Apan nakahunong kog lakaw kay diha sab diay si Lemuel.
(TAPUSON SUNOD GULA)