KAP ISUMBONG KANG DUTERTE

SINAS NASUKO SA PAGGUBA NI REPOLLO SA KORAL SA LUNA ALANG SA POLICE STATION

Gipa-demolish ni Barangay Kapitan Kirk Bryan Repollo sa Inayawan, Cebu City ang koral sa luna nga maoy tukoran unta sa kontrobersyal nga police station.

Tungod sa iyang gibuhat, si Police Regional Office (PRO) 7 Director Police Brig. Gen. Debold Sinas mosumbong kang Presidente Rodrigo Duterte.

Ang luna gidonar sa miaging administrasyon sa Inayawan, apan pagpuli ni Repollo, wa na siya mosugot nga anha tukoron ang police station kay kuno, makaapekto sa trapiko.

Matod pa ni Repollo nga isip kapitan, aduna siyay police power ug nuisance ang pagkoral sa PRO 7 sa kapin 500 metro kwadrado nga yuta atbang sa barangay hall.

Niadtong Abril 2018, nagground breaking ang kapulisan uban ni Konsehal Joel Garganera.

Apan wa madayon ang construction sanglit napilde ang incumbent nga kapitan sa eleksyon sa Mayo 2016 nga si Lutherlee “Lotlot” Ignacio-Soon .

Gibakwi ni Repollo uban sa mga konsehal ang nahiunang donasyon sa yuta ug nitanyag sila og laing lugar.

Ang mga barangay tanod ug residente sa Inayawan niguba pinaagi sa pagtangtang sa mga sin ug tubo, ug nawala na ang blindspot sa karsada.

Malinawon ang pagguba sa perimeter fence ug way tension nga nitumaw sanglit way presensiya sa pulis.

Si Repollo niingon nga uyon ang barangay sa pagtukod sa police station, apan didto sa luna duol sa barangay gym kay di makabalda sa trapiko.

Gitanyag niya ang tulo ka andana nga bag-ong edepisyo aron gamiton sa pulis nga nahimutang sa kilid sa gym.

BRING IT ON

Gihangop ni Repollo ang gipadayag ni Sinas nga ipaubos siya sa background check human nakuha ang 18 kilos nga shabu sa iyang barangay.

“Bring it on. Di ta mahadlok ana kay wa tay gitagoan. Di mi mahadlok i-background check kay limpyo among pagkatawo, limpyo ang among pagpakabuhi diri, ligdong among pamilya ug ligdong ang among kagikan,” emosyonal nga padayag ni Repollo.

“Kani akong luha karon, dili lang gyud nako mapugngan ang akong kalagot tungod sa ilang kapakyas, ilang itapon namo diri. Kon sakto pa ilang intelligence network, nakit-an na unta na nila sa port of entry,” dugang sa batan-ong kapitan.

Iyang gibasol ang kapulisan gumikan sa ilang kapakyas pagpaniid sa illegal drug trade.

Iyang gipadayag nga di siya drug protector.

Gihulagway ni Repollo nga pagpang-harass ang gibuhat sa kapulisan ngadto kaniya.

Gipadayag niya nga ang liderato sa kapulisan wa mosuporta sa administrasyon ni Mayor Tomas Osmeña.

“Abi BOPK (Bando Osmeñe, Pundok Kauswagan) ko, abi connected ko ni Mayor Tommy Osmeña, inyo ming initan og maayo. Klaro na kaayo sa pattern giuna ninyo ang Lusaran, gisunod ang Calamba. Karon Inayawan?,” butyag ni Repollo

Mga barangay kapitan sa Lusaran ug Calamba na-priso gumikan sa paghupot og armas nga way lisensiya, apan nakabuhi ra.

CYBER LIBEL

Gipasidan-an nang daan ni Repollo si Garganera nga paandamon sa iyang counter affidavit sanglit iyang pasakaan og kasong libel gumikan sa iyang post sa Facebook..

Lakip sa iyang kasohan og oral defamation mao si Sinas, kinsa nagpa-interbyu sa tigbalita nga giingong nakadaot sa pagkatawo ni Repollo.

Apan si Garganera niingon nga wa siya mahadlok sa kaso.

Dili sab malisyuso ang iyang post sa Facebook sanglit iyang gipadayag nga kon nadayon pa og tukod ang police station, posible nga way drugas sa maong lugar sanglit ang dapit nga nakuhaan sa 18 kilos nga shabu mga 13 ra ka establisemento ang nag-uwang.

DUTERTE

Itug-an ni Sinas ang pagguba ni Repollo sa koral sa luna nga mao untay balhinan sa Pardo police station.

Matod ni Sinas nga ipaagi niya kang Department of Interior and Local Government Secretary Eduardo Año ang ilang report sa gihimo ni kapitan Repollo, gawas sa kasong criminal nga ipasaka unya sa contractor ngadto sa korte.

Gipasabot ni Sinas nga iya nang gimandoan ang hepe sa Pardo police station Police Major Regino Maramag pagdokumento sa mga butang nga gipangguba sa kapitan alang na sa pormal nga pagsang-at sa ilang reklamo.

“Ipaabot namo na. We will do all the records didto. I-document sa namo. Pa-picturan sa namo kay iagi gyud namo na kay SILG (Sec. Año) na that is what they did to our project,” matod ni Sinas.

Nakig tagbo na usab si Sinas sa ilang in-house Commission on Audit (COA) labot sa lakang sa PRO-7 batok sa kapitan.

Nisugyot matod pa kini nga ang contractor na ang mopasaka og kasong criminal ngadto sa korte batok sa kapitan sanglit na award na ang proyekto.

Ang Philippine National Police migahin na sa P5,000,000 alang sa pagpatukod sa building sa Police Station 7 human nakompleto ang mga dokumento sama sa deed of donation sa ni Ignacio-Soon.

Iyang gipasabot nga kon na-award na ang proyekto sa gobyerno, di na kini mahimong ibalhin bisan asa sanglit specific ng nakasulat sa dokumento diin didto tukuron ang building.

“The project is national. Tingala gani mi unsa gyud ang iyang problema sa lot didto and it was donated and signed by all the barangay kagawad. Tapos siya lang mag-estorya unilateral nga ibalhin nato na didto kay dili ko ganahan. Karon lang na nimo i-estorya sa amoa nga natapos na tanan, ang bid na award na,” dugang ni Sinas sa mga tigbalita sa usa ka press conference./