Lancers gipalagpot sa Panthers sa City of Naga caging

Gipalagpot sa University of Southern Philippines Foundation (USPF) Panthers ang inilog ug multi-titled University of the Visayas (UV) Green Lancers, 103-92, sa 1st City of Naga Inter-collegiate basketball tournament nga gipahigayon niadtong Lunes sa gabii sa Enan Chiong Activity Center sa dakbayan sa Naga.

Ang kadaugan sa Panthers maoy nakahulma og triple tie tali sa UV, USPF ug sa University of Cebu (UC) Webmasters nga pulos mitapos sa elimination round nga may 1-1 nga baraha.

Ang UV mipukan sa UC, 9389 niadtong Dominggo samtang ang Panthers napildi usab sa Webmasters sa opening day niadtong Sabado, 72-70.

Sa quotient system diin gigamit ang point-difference aron pagdeterminar kon kinsa ang mo-qualify sa cross-over semifinals round, miguwa nga ang USPF maoy na no. 1 sa Bracket A nga may +9 points, samtang ang UC maoy nagsunod nga may -2 points. Ikatulo lang ang UV, -7 points.

Human mabiyai og 16 puntos sa first half, ang Lancers misuway paggukod sa tungatungang bahin sa fourth quarter apan ang pagpakunhod sa labaw sa Panthers ngadto sa otso puntos mao ray pinakaduol nilang nahimo.

Ang import nga si Rich Managor maoy nangulo sa kadaugan pinaagi sa iyang 19 puntos samtang midugang usab og tag 13 puntos sila si Graggy Saharina ug Kenneth Capa.

Si Alfred Butohan mitali og 14, Claridad nga may 13 samtang mitapos si Gileant Delator og nuebe puntos alang sa pildirong Lancers.

Kon kahinudoman, ang UV napildi usab sa USPF sa Minglanilla Mayor’s Cup niadtong Disyembre sa duwa nga nakarambola pinaagi sa default. Hinuon ang Lancers maoy nakampiyon niadtong higayona.

“Morag balhibo-an gyud mi sa USPF da,” matod ni Digoy Villanueva, UV team manager.

Ang kapildihan gidayandayanan sa uwahing pag-abot ni coach Garry Cortes kinsa naigo sa traffic. Si Cortes, uban sa iyang assistant nga si Junniel Maglasang niabot sa

second quarter diin Panthers nakaposte na og 12 puntos.

Sa main game, gilubong sa University of San Jose Recoletos

(USJ-R) Jaguars ang way import nga Southwestern University (SWU) Cobras, 75-64, sa ilang kaugalingong knockout match.

Sa presensiya sa import nga si Segamars Ewenike, ang Jaguars tataw nga midominar sa ilawom nga bahin.

Niabot og 20 puntos kapin ang labaw sa Jaguars sa third

quarter ug wala na gyud kini mahulga pa.

Ikasangka sa Jaguars ang USPF Panthers sa semifinals round nga sugdan sa Marso 10 (Dominggo) sa alas 6 sa gabii.

Magtakos usab ang University of Cebu ug ang San Carlos Warriors sa laing semis match sa alas 7:30 ang takna.