PRO 7 walay hit list: Sinas

Di tinuod ang nanggawas sa social media labot sa giingong listahan sa mga nalambigit sa illegal nga drugas sa lungsod sa San Fernando, diin sagad naa niini pulos magpapili sa umaabot nga eleksyon sa Mayo.

Matod ni Police Regional Office Director Police Brigadier General Debold Sinas nga ang PRO 7 way gipagawas nga mga target list.

Bisan ang ilang buhatan way kopya niini.

Nagduda ang heneral nga ang nag himo sa peke nga impormasyon sa social media mao kadtong mga misuporta sa kaatbang niining maong mga politiko nga way mahimo gawas sa pagpanaot sa ilang kontra.

“Kanang gipagawas nila nga name because election time na kasi. Ang among huna-huna ani kining ilang giestorya nga hit list nga ingon ani because of election, those are supporters sa pikas,” matod ni Sinas.

Giangkon ni Sinas nga naglisod sila sa pag-ila kinsa ang nagmugna sa maong Facebook account tungod kay sa dihang ilang gipasubay sa Anti Cyber Crime Group 7, di na nila makita kay gipang deactivate na.

Niduol na sa iyang buhatan kadtong pipila ka mga gipangnganlan ug iya na usab kining gitambagan nga magbantay lang sa ilang kaugalingon.

Aduna na usab siyay gipapatrolya nga mga pulis sa tibuok lungsod sa San Fernando ug nakabantay siya nga milurang na ang tensyon.

Ang mao nga hit list giingong ikaduha, human gitumbok ang unang listahan, diin usa na lang ka opisyal ang buhi nga naa sa listahan.