EWAS category sa Lapu gius-os sa yellow

Wa na kinahanglana ang augmentation force gikan sa rehiyonal nga buhatan sa Philippine National Police (PNP) nga mao unta ang modugang sa puwersa sa LapuLapu City Police Office atol sa adlaw sa piniliay.

Kini gumikan kay gi-us os na ngadto sa yellow category gikan sa pagka orange category sa Election Watchlist Areas (EWAS) ang maong siyudad.

Nipasabot si Atty. Rainer Layson, ang bag-ong milingkod nga election officer sa dakbayan, nga mga mas menos ang security requirement sa higayon nga ideklarar sa yellow category ang usa ka lugar, apan bisan pa man niini dili gihapon angayan mokumpaniyansa.

“Personally sa akong assessment we can downgrade na from orange to yellow, kasi as of this time ang atong concern is intense politically rivalry, used of armed group is unlikely dito sa Lapu-Lapu,” pamahayag ni PSSupt. Limuel Obon.

Ang City Comelec, City Police Office ingon man ang counterpart gikan sa Philippine Air Force ug Navy ang nagtagbo kagahapon alang sa City Joint Security Coordinating Council (CJSCC) meeting diin gihisgutang ang mga preparasyon sa nagkaduol na nga May 13 election.

Nakanayon si Obon nga taliwala sa iyang tinguha nga madugangan ang puwersa sa iyang kapulisan, adunay ubang area sa probinsiya sa Sugbo nga mas nagkinahanglan ug angayan lang nga sila maoy palabihon.

“I will try to manage my resources here. Anyway, naa man tay Air Force ug Navy nga maka-augment,” pasabot sa police official.

Sa susamang kalambuan, gipahibawo ni Atty. Layson nga ilusad karong Marso 29 ang Task Force Baklas nga maoy unang adlaw sa campaign period sa mga local nga kandidato.

Nipasidaan ang election officer nga wa silay pasayluon niadtong mga campaign material nga gipamutang sa publiko lugar sanglit ilang kining panangtangon pinasikad sa pagpatuman sa R.A. 9006 kon Fair Election Act.

Ang mga kandidato gipahinumduman nga dili motaod sa ilang campaign materials sa publikong lugar sama sa waiting shed, punoan sa kahoy, poste, government buildings, terminal ug uban pa.