9 ka brgy. sa Cebu City unahon sa Oplan Ligtas

Siyam ka mga barangay sa dakbayan sa Sugbo ang gihimong pilot barangays sa Bureau of Fire Protection (BFP) 7 diin pagahimuon ang Oplan Ligtas na Pamayanan.

Ang maong Oplan motuki kini sa gidaghanon sa panimalay nga anaa sa matag Sitio sa usa ka barangay aron himuon ang community fire protection plan.

Lakip niini ang Cogon, Suba, Tisa, Sambag II, T. Padilla, Hipodromo, Talamban, Camputhaw, ug Capitol Site.

Matod ni Cebu City Fire Marshal Chief Insp. Noel Nelson Ababon nga pinili kini nga mga barangay sa ilahang mga station commanders alang sa nagkadaiyang training ug household survery.

Usa sa mga factors nga ilahang gitan-aw kon aduna ba kini fire brigade team nga magsilbi unya nga Community Fire Auxillary Group.

Dugang ni Ababon nga daling mapatuman ang oplan pinaagi sa fire brigade teams sa matag barangay.

Sa dili pa himuon ang maong kalihukan nga ubos nga gitawag nga “Handang Pamayanang Program,” mopahigayon usab sila og hazard identification, hazard elimination, ug tactical defense.

Adunay hazard mapping nga buhato aron dali na nga ma-identify ang escape route paingon sa tagsa-tagsa ka mga safe zones ug evacuation area.

Dugang ni Ababon nga ubos sa “Bayanihang Program” mao ang pag-umol og Community Fire Auxillary Group nga maoy hatagan og tahas dili lang ang mga kawani sa barangay kon dili lakip na ang nga residente sa barangay.

Responsibilidad sa mga auxillary mao usab ang pagguide sa mga biktima paingon sa evacuation center, motabang sa panglawas, moatiman sa traffic, ug uban pa.

Tumong sa maong programa nga gipangulohan ni Fire Sr. Supt. Gilbert Dolot nga maminusan ang sunog ngadto sa labing ubos nga lebel sa komunidad.