11 anyos gitugyan na sa task force

Gipadayag ni Lapu-Lapu City Mayor Paz Radaza nga anaa na sa Task force Malasakit sa Dakbayan sa Lapu-Lapu ang kaso sa 11-anyos nga batang babayeng nangangkong gisuwayan og dagit og lalakeng luwan sa usa ka puti van niadtong miaging semana.

Kini human naabot na usab sa mayor ang insidente.

Ang Task Force Malasakit usa ka buhatan sa Dakbayan nga maoy mag-atiman sa mga suliran nga may kalabot sa kabataan sa dakbayan.

Ang Task Force Malasakit mao na usay mopaubos sa bata sa mga posibleng psychological intervention o stress debriefing sanglit aduna man silay mga social worker.

Ang kapulisan una nang misugyot nga ipaubos sa psychological intervention ang bata sanglit dako ang ilang pagduda nga nahiagom kini sa “trauma” hinungdan nga nakapangangkon nga gisuwayan og dagit bisan kon wala.

Bisan pa niini, wa gihapoy kompiyansa ang Dakbayan sa seguridad sa kabataan hilabi na ang mga tinun-an sa nagkadaiyang tunghaan.

Gibutyag sa mayor nga iya nang gimandoan ang task force sa pagsuroy sa mga tunghaan aron ma-monitor ang mga tinun-an hilabi na panahon sa tingpamuhi.

Iya na usab gipahinumdoman ang mga barangay kapitan ug kadagkuan sa mga tunghaan nga kanunayon ang monitoring aron masiguro ang kaluwasan sa mga tinun-an.

Ang director hinuon sa Lapu-Lapu City Police Office nga si Police Colonel Limuel Obon nipasalig nga wala pa gayuy kompirmadong insidente sa dakbayan kalabot sa pagpangdagit o suway og pagdagit og bata. /